,,გორი არ არის წითელი, გორელები ირჩევენ პროგრესს“ - სტალინელებს დღეს ევროპის დღეებს დაუპირისპირებენ

პოლიტიკა - 11:42, 09 May, 2016

4522

9 მაისი, ფაშიზმზე გამარჯვების დღეა. ეს დღე ბოლო წლებია პრორისულად განწყობილი ადამიანების შეკრების კარგ მიზეზად იქცა. შეკრების ლოკაცია წელსაც გორია, ქალაქში, რომელსაც ყველაზე კარგად ამ დრომდე ეტყობა რუსული ჩექმის და ავიაციის კვალი, ხვალ ის ადამიანები შეიკრიბებიან რომლებმაც გასულ წელს ტრანსფარანტებით და დროშებით ხელში საქართველოს რუსეთთან შეერთება და პროდასავლური კურსის შეცვლა მოითხოვეს. რუსეთის დროშებით ხელში და ე.წ. გეორგიევსკის ლენტებით ,,გულდამშვნებულები" ხვალაც ისევ სტალინის სკვერში შეკრებას და დიდი ბელადის ძეგლის ქალაქში დაბრუნების მოთხოვნით აქციის გამართვას გეგმავნ. აქციის ორგანიზატორები თანამოაზრებს სხვადასხვა რეგიონებიდან და ყოფილი საბჭოთა კავშირის წევრი ქვეყნებიდან ელიან.

დაგეგმილი აქციების პარალელურად გორელები ევროპის დღეებს ზეიმობენ. ღონისძიებებს ორგანიზებას საინიციატივო ჯგუფი უწევს, რომელიც რამდენიმე პროდასავლური განწყობის მქონე ადგილობრივიმა ჩამოაყალიბა. როგორც ,,ნიუპოსტს" ერთ-ერთმა მათგანმა, გვანცა დოლუაშვილმა განუცხადა ხვალ 12:00 საათზე, გორის უნივერსიტეტში საჯარო ლექცია გაიმართება, სახელწოდებით ,,ტოტალიტარიზმის პოლიტიკური ასპექტები" დღის ბოლოს კი კულტურისა და დასვენების პარკში ჩატარდება აქცია კონცერტი, რომელშიც მონაწილეობას ჯგუფი ,,კანოდუსი" და Loudspeakers-ი მიიღებს. ეს ყველაფერი კი იმის ნიშნად, რომ გორი არ არის წითელი და გორელები ირჩევენ პროგრესს.