,,მე ვხედავ ერს, რომელსაც აქვს ხედვა და იცის, როგორ შექმნას ევროპული სახელმწიფო“

,,მე ვხედავ ერს, რომელსაც აქვს ხედვა და იცის, როგორ შექმნას ევროპული სახელმწიფო“ - პრეზიდენტი

პოლიტიკა - 17:48, 08 May, 2016

2388

საქართველოს პრეზიდენტმა გიორგი მარგველაშვილმა დღეს საქართველოში ევროკავშირის წარმომადგენლობისა და ევროკავშირის წევრი ქვეყნების საელჩოების მიერ ორგანიზებული „ევროპული დღეები“ გახსნა.

როგორც რიყის პარკში სიტყვით გამოსვლისას საქარველოს პრეზიდენტმა აღნიშნა, 2016 წელი ევროპული სახელმწიფოს წლად გამოაცხადა, რადგან წელს ჩვენი სახელმწიფოებრიობის თვალსაზრისით ძალიან მნიშვნელოვანი ნაბიჯები იდგმება.

„25 წლის წინ ჩვენ ერთად ვიდექით, რათა საბჭოთა კავშირის მარწუხებისაგან გავთავისუფლებულიყავით და შეგვექმნა ქართული, დამოუკიდებელი სახელმწიფო. გამოვსულიყავით და ამაყად გვეთქვა, რომ ჩვენ ქართველებს, რომლებსაც სამიათასწლიანი ისტორია გაგვაჩნია, ვიწყებთ ახალი ქვეყნის შენებას და ჩვენ ეს ერთად შევძელით!

დღეს ჩვენ უნდა გადავდგათ კიდევ ერთი მნიშვნელოვანი ნაბიჯი დამოუკიდებლობიდან თავისუფლებისაკენ. თავისუფლებისაკენ ნაბიჯის გადადგმა ნიშნავს, იმას, რომ შენ შექმნი შენსას, უნიკალურს, განსაკუთრებულსა და თანამედროვეს.

დღეს ჩვენ ახალ ნაბიჯს ვდგამთ ევროპული სახელმწიფოს შექმნის თვალსაზრისით. მე ვხედავ ერს, რომელსაც აქვს ხედვა და იცის ხვალ რა უნდა გააკეთოს, ქვეყანას, რომელიც თავის ტერიტორიებს გაამთლიანებს, არა ომით, არამედ იმით, რომ განსაკუთრებულ ქვეყანას და თავისუფლებას შექმნის.

ჩვენ ერთად დგომით შევძლებთ ამას, რასაც წელს განსაკუთრებულად დავამტკიცებთ, რადგან თითოეული თქვენგანი მივა არჩევნებზე და ქვეყნის მომავალ ბედს გადაწყვეტს. გაუმარჯოს ევროპულ საქართველოს და ღმერთი ფარავდეს მას!“ - განაცხადა საქართველოს პრეზიდენტმა.

საქართველოს პრეზიდენტმა ევროკავშირის ელჩთან ერთად რიყეზე, ევროკავშირის წევრი ქვეყნების კუთხეები დაათვალიერა, სადაც „ევროპის დღეების“ მონაწილეებს ამ ქვეყნების მიერ საქართველოში განხორციელებული აქტივობებისა და პროგრამების შესახებ ინფორმაციას აცნობენ. ევროპული დღეების გახსნას ესწრებოდნენ საქართველოს პრეზიდენტის ადმინისტრაციის უფროსი გიორგი აბაშიშვილი, ეროვნული უშიშროების საბჭოს მდივანი ირინე იმერლიშვილი, პრეზიდენტის მრჩევლები თენგიზ ფხალაძე და ფიქრია ჩიხრაძე.