საქართველოს თავდაცვის სამინისტროს დაჭრილ და დაშავებულ სამხედრო მოსამსახურეთა გუნდი საერთაშორისო შეჯიბრება „ძლიერთა თამაშებში“ (Invictus Games 2016) წარმატებით ასპარეზობს. ქართველმა სამხედროებმა მჯდომარე ფრენბურთში საკმაოდ კარგად მომზადებული იორდანიის ნაკრები დაამარცხეს და ნახევარფინალში გავიდნენ. მანამდე კი, შესარჩევ მატჩებში დანიისა და ესტონეთის ნაკრებებთან გაიმარჯვეს და ამით ჯგუფური ეტაპი დაძლიეს. „ძლიერთა თამაშების“ მონაწილეებს უშუალოდ გულშემატკივრობს გაერთიანებული სამეფოს პრინცი. პრინც ჰარისთან ქართველმა მოასპარეზეებმა სამახსოვრო ფოტოებიც გადაიღეს.

საქართველოს ტერიტორიული მთლიანობისთვის გამართულ ბრძოლებსა და საერთაშორისო ოპერაციებში დაჭრილი სამხედრო მოსამსახურეები აშშ-ში, ქალაქ ორლანდოში, გაერთიანებული სამეფოს პრინცის, მისი აღმატებულება პრინც ჰარის პატრონაჟით გამართულ „ძლიერთა თამაშებში“ მონაწილეობენ. საერთაშორისო შეჯიბრება 8-12 მაისს უოლტდისნეის ESPN სპორტულ კომპლექსში გაიმართება.