ზუგდიდი და წყალტუბოში მომხდარ ინციდენტებს პარტია „ქართული ოცნება-დემოკრატიული საქართველოს“ განცხადებით გამოეხმაურა. პარტიის განცხადებით მათ ინტერესებში შედის არჩევნების დემოკრატიულ, თავისუფალ და მშვიდ გარემოში ჩატარება და მოუწიდებენ შესაბამის ორგანოებს „ნაციონალური მოძრაობის“ ოფისების წინ განთავსებული პარტიის სააგიტაციო მასალის დაზიანების ფაქტზე მყისიერი რეაგირება მოახდინონ. პარტიის განცხადებას „ნიუპოსტი“ უცვლელად გთავაზობთ:

„ჩვენთვის ცნობილი გახდა, რომ ზუგდიდის რაიონის სოფელ კორცხელში და სოფელ წყალტუბოში მოხდა „ნაციონალური მოძრაობის“ ოფისების წინ განთავსებული პარტიის სააგიტაციო მასალის დაზიანება. ამასთან, არ გამოვრიცხავთ, რომ მსგავსი პროვოკაციები შესაძლოა მიზანმიმართულად მომავალშიც განხორციელდეს. ასეთი ფაქტები ძაბავს წინასაარჩევნო გარემოს.
"ქართული ოცნება-დემოკრატიული საქართველოს" ინტერესებშია არჩევნები ჩატარდეს აბსოლუტურად დემოკრატიულ და თავისუფალ, მშვიდ გარემოში. შესაბამისად, ნებისმიერი სახის დარღვევა ან ფაქტი, რომელიც ჩრდილს მიაყენებს არჩევნების დემოკრატიულად ჩატარების პროცესს, დაუყონებლივ უნდა აღიკვეთოს, საჭიროების შემთხვევაში კი დაიწყოს გამოძიება.
აღნიშნული ფაქტი „ქართული ოცნება-დემოკრატიული საქართველოსთვის“ კატეგორიულად მიუღებელია. მივმართავთ თხოვნით შესაბამის ორგანოებს, მყისიერი რეაგირება მოახდინონ მსგავს ფაქტებზე.“- აღნიშნულია განცხადებაში.

აღნიშნულ ფაქტზე განცხადება გაავრცელა "ერთიანმა ნაციონალურმა მოძრაობამაც".