პარლამენტის გარემოს დაცვის კომიტეტში ბოტანიკური ბაღის საზღვრების ცვლილებისა და 29 ჰექტარი ფართობის მიწის გაყიდვის თემის განხილვა იწყება. შეხვედრას არასამთავრობო ორგანიზაციების წარმომადგენლები ესწრებიან.

საპარლამენტო ოპოზციას სხომაზე მიწვეული ჰყავს გიგლა აგულაშვილი და თბილისის მერიის წარმომადგენლები, თუმცა, განხილვას ამ ეტაპზე არცერთი უწყების წარმომადგენელი არ ესწრება.

აღნიშნულ საკითხზე კომენტარი გააკეთა საქართველოს პარლამენტის თავმჯდომარემ დავით უსუფაშვილმა და დავით ნარმანიას განცხადება დაუწუნა, რომლის მიხედვითაც, თბილისის მერი დეკემბრამდე საკრებულოში მისვლას არ აპირებს:

„ყველაზე მეტად გამაოცა თბილისის მერის, ჩემი დიდიხნის კოლეგისა და მეგობრის, დავით ნარმანიას პოზიციამ იმის თაობაზე, რომ ის დეკემბრამდე საკრებულოში მისვლას არ აპირებს, უბრალოდ გავოცდი ასეთი განცხადების გამო. მე მინდა ვთხოვო, ვურჩიო დავითს, რომ გაითვალისწინოს ბევრი რამ. თუ დეკემბრამდე ის არ მივა საკრებულოში, შესაძლოა დეკემბრის შემდეგ საკრებულოს არ მოუნდეს მასთან შეხვედრა და არა მხოლოდ საკრებულოს, ეს არ არის სწორი პოზიცია, ვინც ასე ეპყრობოდა საკრებულოს და პარლამენტს, მერები, მინისტრები თუ პრემიერ-მინისტრები, დიდი წარმატებებისთვის არ მიუღწევიათ, ამაზე ჩვენი უახლესი ისტორია მეტყველებს. აღარ ჩავალ დეტალებში. ყველა საკითხზე ყველას უნდა ჰქონდეს პასუხი“, - განაცხადა დავით უსუფაშვილმა.

ბოტანიკური ბაღის თემაზე რიგგარეშე სხდომის დანიშვნასთან და მასზე დედაქალაქის მერის დაბარებასთან დაკავშირებით საკრებულოს ოპოზიციის და არასამთავრობო სექტორის მოთხოვნას დედაქალაქის მერი გუშინ გამოეხმაურა. დავით ნარმანია გამონაკლისის დაშვებას არ აპირებს და საკრებულოს წინაშე წარდგომას მხოლოდ დეკემბერში აპირებს:

„მივალ აუცილებლად ოღონდ დეკემბრის თვეში, ეს უკვე პრაქტიკად ვაქციეთ ჩვენ, ანუ თბილისის მერი საკრებულოს წინაშე წარსდგება წელწადში ერთხელ კანონმდებლობით დადგენილი წესით. დეკემბერში წარვადგენ ბიუჯეტსაც და პასუხს გავცემ ყველა იმ კითხვას რაც იქნება დასმული.“- განაცხადა დავით ნარმანიამ.

აღსანიშნავია, რომ დღეს ბოტანიკური ბაღის სტატუსის შესახებ საქართველოს კულტურის მინისტრმა, მიხეილ გიორგაძემ განმარტება გააკეთა და აღნიშნა, რომ ბოტანიკურ ბაღს კულტურული მემკვიდრეობის ძეგლის სტატუსი არ აქვს.