ხელისუფლებამ უნდა გადადგას ნაბიჯი და მიიღოს შეთავაზებული გერმანული მოდელი

ხელისუფლებამ უნდა გადადგას ნაბიჯი და მიიღოს შეთავაზებული გერმანული მოდელი - ბაჩუკი ქარდავა

პოლიტიკა - 15:20, 05 May, 2016

1916

ეროვნულ დემოკრატიული პარტიის ლიდერი ბაჩუკი ქარდავა აცხადებს, რომ ინტერპარტიული ჯგუფი სახელისუფლებო გუნდს სთავაზობს არჩევნები ჩატარდეს ეგრეთ წოდებული გერმანული მოდელით. ედპ-ს ლიდერის განცხადებით პრეზიდენტის ადმინისტრაციის წარმომადგენლებთან განსახილველი ერთ-ერთი მთავარი საკითხი სწორედ საარჩევნო სისტემა იქნება:

„ინტერპარტიულ ფორმატში არის სრული კონსესუსი იმისთვის, რომ არჩევნები ჩატარდეს ე.წ გერმანული მოდელით, ბუნებრივია დღევანდელ შეხვედრაზე ეს საკითხი ერთ-ერთი მთავარი იქნება. აუცილებლად განვიხილავთ საარჩევნოს სიებთან დაკავშირებულ პრობლემას. რადგან ეს თემა იმდენად მტკივნეულია, რომ რაც უფრო ახლოვდება არჩევნების დღე, მით უფრო მწვავედ დადგება ხელისუფლება ამ პრობლემის წინაშე“, - აღნიშნა ბაჩუკი ქარდავამ და კიდევ ერთხელ ისაუბრა არჩევნების ლეგიტიმაციის საკითხზე.

„იმისთვის, რომ ლეგიტიმაციის საკითხზე მოიხსნას ყველა კითხვა, ხელისუფლების მხრიდან უნდა იქნას გადადგმული ნაბიჯი, თუნდაც არაკონსტიტუციური გზით, მიიღოს ჩვენს მიერ შეთავაზებული მოდელი“, - დასძინა ქარდავამ.

გერმანული მოდელის მიხედვით, არჩევნები ორივე სისტემით ტარდება, თუმცა მანდატების განაწილება პროპორციულად მიღებული ხმების შესაბამისად ხდება.