ინტერპარტიული ჯგუფი პრეზიდენტის ადმინისტრაციის წარმომადგენლებთან შეხვედრამდე კონსულტაციებს მართავს

პოლიტიკა - 11:47, 05 May, 2016

1152

სასტუმრო "თბილისი მერიოტში" ინტერპარტიული ჯგუფის წევრების შეხვედრა მიმდინარეობს. როგორც ცნობილია არასაპარლამენტო ოპოზიცია პრეზიდენტის ადმინისტრაციის წარმომადგენლებთან დაგეგმილ შეხვედრამდე იმ საკითხებს კიდევ ერთხელ განიხილავს, რაზეც პრეზიდენტის სასახლეში მსჯელობა გაიმართება.

შეხვედრაზე საუბარი შეეხება საარჩევნო გარემოს გაუმჯობესებასთან დაკავშირებულ საკითხებს, კერძოდ ე.წ. გერმანული მოდელს, ამომრჩეველთა სიებს და არჩევნების თარიღის დანიშვნას.

ე.წ. გერმანული მოდელი, რომ პარლამენტში გავიდეს საჭიროა 76 ხმა.

როგორც ინტერპარტიული ჯგუფის წევრები აცხადებენ, ამ საკითხებთან დაკავშირებით კონსულტაციები მიმდინარეობს იმ პოლიტიკურ პარტიებთან, რომლებმაც უმრავლესობა დატოვეს. კერძოდ - "რესპუბლიკელებთან" და "ეროვნულ ფორუმთან".

რაც შეეხება პრეზიდენტის ადმინისტრაციაში ჩანიშნულ შეხვედრას, ამ საკითხზე ჟურნალისტებთან კომენტარი გააკეთა "ეროვნულ დემოკრატიული პარტიის" ლიდერმა ბაჩუკი ქარდავამ.

"სამი ძირითადი თემაა, რომლის განხილვაც არის დაგეგმილი შეხვედრაზე. უპირველესია კვლავ სისტემა და აქ საუბარია ე.წ გერმანულ მოდელზე, რახან ხელისუფლებას არგუმენტად ვადები მოჰყავს, ჩვენ ვთავაზობთ შევცვალოთ დათვლის პუნქტი. ეს არ მოითხოვს საკონსტიტუციო ცვლილებას"- თქვა ბაჩუკი ქარდავამ.

მისი თქმით, არჩევნების ჩატარების თარიღი რაც შეიძლება მოკლე ვადებში უნდა გახდეს ცნობილი.

"პოლიტიკურ პარტიებს უნდა მიეცეთ საშუალება ჩაატარონ წინასაარჩევნო კამპანია, თუმცა ყველაზე მთავარი ჩვენთვის მაინც საარჩევნო სისტემის ცვლილებაა"- აღნიშნა ედპ-ს ლიდერმა.

ცნობისთვის დღეს, 15:00 საათზე პრეზიდენტის სასახლეში პრეზიდენტის ადმინისტრაციის წარმომადგენლების შეხვედრა გაიმართება ინტერპარტიული და 5 საპარლამენტო ჯგუფის (ნაციონალური მოძრაობა, თავისუფალი დემოკრატები, გირჩი, ეროვნული ფორუმი და რესპუბლიკური პარტია) წარმომადგენლებთან.