“თავისუფალი საქართველო” არასაპარლამენტო პარტიებს მიმართავს და გაერთიანებისკენ მოუწოდებს

პოლიტიკა - 13:28, 04 May, 2016

1574

,,თავისუფალი საქართველო" არასაპარლამენტო პარტიებს მიმართავს და პოლიტიკურ ძალებს ერთიანობისკენ მოუწოდებს. როგორც განცხადებაშია ნათქვამი, ოქტომბრის არჩევნებში მთავარი ამოცანა სააკაშვილ-ივანიშვილის ორპარტიული სისტემის დამარცხებაა.

,,მიგვაჩნია, რომ ბოლო პერიოდის მოვლენებმა არაერთხელ დაგვარწმუნეს, რომ ჩვენი ქვეყნის მთავარი უბედურება არის 2 კორუმპირებული პოლიტიკური ძალა - ნაციონალური მოძრაობა და ქართული ოცნება. შესაბამისად, ქვეყნის ყველა ჯანსაღი, საღად მოაზროვნე ძალის ამოცანა ოქტომბრის საპარლამენტო არჩევნებში უნდა გახდეს სააკაშვილი-ივანიშვილის ორპარტიულის სისტემის დემონტაჟი.

დღესავით ნათელია (და ბოლო პერიოდის არჩევნების შედეგებიც აჩვენებს), რომ დღეს არცერთ პარტიას ცალკე აღებულს არ შესწევს ძალა, დამოუკიდებლად დაამარცხოს ეს 2 ანტიდემოკრატიული, კლანური დაჯგუფება. ამის მიღწევა შეიძლება მხოლოდ არასაპარლამენტო ძალების ერთიანობით.

ვინაიდან, ზოგადი საუბრები ოპოზიციის ერთიანობაზე უკვე კარგა ხანია გრძელდება შედეგების გარეშე, საჯაროდ მივმართავთ არასაპარლამენტო პარტიებს კონკრეტული წინადადებებით:

1. ჩამოვაყალიბოთ ერთიანი საარჩევნო ბლოკი;

2. ბლოკი არ ითანამშრომლებს “ქართულ ოცნებასთან”, “ნაციონალურ მოძრაობასთან” და მათგან გამოყოფილ პარტიებთან, რომლებიც სრულად იზიარებენ პასუხისმგებლობას დღევანდელი და წინა ხელისუფლების დანაშაულებრივ პოლიტიკაზე;

3. ქვოტები სიაში გადანაწილედება წინა არჩევნებში (2014) ცალკეული პარტიების მიერ ნაჩვენები შედეგების მიხედვით;

4. მაჟორიტარი კანდიდატები შეირჩევა დემოკრატიული კენჭისყრით (primary);

5. საარჩევნო ბლოკის ამოცანაა ახალი მთავრობის ჩამოყალიბება ქოც- და ნაც- ელემენტების გარეშე და წინასწარ დეკლარირებული რეფორმების გატარება;

მიგვაჩნია, რომ ერთიანი ბლოკის შექმნაზე უარი და 5%-იანი ბარიერისთვის ბრძოლა ცალკეული პარტიების მხრიდან პირდაპირ წყალს ასხამს დღევანდელი ხელისუფლების წისქვილზე, რათა ივანიშვილმა კიდევ 4 წლით გააგრძელოს ქვეყნის მართვა, ხოლო ქვეყნის მთავარი ოპოზიციური ძალის სტატუსი კიდევ 4 წლის ვადით შეინარჩუნოს სააკაშვილმა“ - ნათქვამია განცხადებაში“ - ნათქვამია კახა კუკავას პარტიის განცხადებაში.