საქართველოს გარემოს დაცვის მინისტრს საპარლამენტო ოპოზიცია პარლამენტში იბარებს. ნაციონალური მოძრაობა სხდომის გამართვას თბილისის ბოტანიკური ბაღის ირგვლივ მიმდინარე პროცესებთან დაკავშირებით ითხოვს. მათი თქმით განხილვას იმ კომპანიის წარმომადგენლებიც უნდა დაესწრონ, ვინც ბოტანიკური ბაღის მიმდებარედ ტერიტორია შეიძინა.

„საზოგადოების მხრიდან არსებული მაღალი ინტერესებიდან და საპროტესტო განწყობიდან გამომდინარე ჩვენ ვითხოვთ დაუყოვნებლივ მოხდეს გარემოს დაცვიოს კომიტეტის მოწვევა საქართველოს პარლამენტში და აღნიშნულ კომიტეტზე ვიწვევთ როგორც თანაინვესტირების ფონდის ხელმძღვანელებს, ასევე მერიის ჩინოვნიკებს, ვისი გადაწყვეტილებითაც ეს პროცესები განხორციელდა, ასევე გარემოს დაცვის მინისტრს“- განაცხადა ზურაბ მელიქიშვილმა.

აღნიშნულ საკითხს გარემოს დაცვის საპარლამენტო კომიტეტის თავმჯდომარე გია ჟორჟოლიანი გამოეხმაურა, მისი თქმით სხდომა უკვე დანიშნულია და ენმ-ს შეთავაზება დაგვიანებულია. მისი თქმით აღნიშნული თემაზე აპელირებით და ბიძინა ივანიშვილის დისკრედიტაციით, „ნაციონალური მოძრაობა“ თავის საარჩევნო კამპანიას ატარებს.