" იყურება აივნიდან და რასაც დაინახავს, ყიდულობს"

" იყურება აივნიდან და რასაც დაინახავს, ყიდულობს" - თბილისში აქციები იწყება

პოლიტიკა - 11:59, 04 May, 2016

6529

7 მაისს ბიძინა ივანიშვილის ვაჟის, ბერა ივანიშვილის კუთვნილ ტელევიზიასთან 25 არასამათავრობო ორგანიზაცია მასშტაბური აქციის გამართვას გეგმავს.

არასამთავრობო სექტორი 29 ჰექტარი მიწის ნაკვეთის გასხვისებას ბიძინა ივანიშვილის სახელს უკავშირებს.

როგორც „ნიუპოსტს“დაგეგმარების და რესტავრაციის ცენტრის ხელმძღვანელმა, ცირა ელისაშვილმა განუცხადა, არასამთავრობოები სასამართლოში შესატან სარჩელსაც ამზადებენ.

თანაინვესტირების ფონდი, რომელმაც შეიძინა აღნიშნული ტერიტორია ბიძინა ივანიშვილის მიერ დაფუძნებული ორგანიზაციაა, შესაბამისად ცალსახად იკვეთება ბიძინა ივანიშვილის ინტერესი“- აღნიშნავს ელისაშვილი.

მისი თქმით, 25 ორგანიზაცია სპეციალური წერილით მიმართავს საკანონმდებლო ორგანოს დაინტერესდეს აუქციონზე გაყიდული ტერიტორიის საკითხით.

არასამთავრობოების მსგავსად სარჩელს ამზადებს ნაციონალური მოძრაობაც. ენმ საკრებულოში თბილისის მერის მისვლას და ღია სხდომის ჩატარებას ითხოვს.

„პროტესტი ნამდვილად არ შეწყდება, ვაპირებთ მივმართოთ სასამართლოს და ამის პარალელურად ქუჩაში გავაპროტესტოთ ის ფაქტი, რომ ბიძინა ივანიშვილმა მიისაკუთრა დედაქალაქის უმნიშვნელოვანესი ნაწილი“- აღნიშნა „ნიუპოსტთან“ ირაკლი აბესაძემ.

ნაციონალური მოძრაობის ინიციატივას მხარს უჭერს დამოუკიდებელი დეპუტატი ალეკო ელისაშვილიც.

მისი თქმით, თბილისის მერმა ქალაქის ინტერესებს უღალატა.

„ივანიშვილი არის კაცი, რომელსაც თავისი ხუშტურები აქვს... იყურება აივნიდან და რასაც დაინახავს, ყიდულობს და ღობავს... - აცხადებს დეპუტატი.

ქართულ ოცნებაში არ გამორიცხავენ, რომ აუქციონზე გატანილი ტერიტორია ბიძინა ივანიშვილს ეყიდა.

„ ბოტანიკური ბაღის მიმდებარედ 29ჰა მიწის გაყიდვაში, თუ რაიმე კანონის დარღვევა იყო ნახონ. არ შეიძლება ქართველმა იყიდოს და შეიძლება, არაბმა იყიდოს? „ აცხადებს უმრავლესობის დეპუტატი გია ჟორჟოლიანი.

ბოტანიკური ბაღის მიმდებარედ, 29 ჰექტარი მიწის ნაკვეთი, გუშინ თანაინვესტირების ფონდმა 6 მილიონ 326 ათას ლარად შეიძინა.