ბოტანიკური ბაღის გაყიდულ ტერიტორიაზე სასტუმრო აშენდება

ბოტანიკური ბაღის გაყიდულ ტერიტორიაზე სასტუმრო აშენდება - მერიის განცხადება

პოლიტიკა - 18:37, 03 May, 2016

2373

თბილისის მერია ბოტანიკური ბაღის 29 ჰექტარი მიწის ნაკვეთის გასხვისებასთან დაკავშირებით განცხადებას ავრცელებს. დედაქალაქის მუნიციპალიტეტში განმარტავენ, რომ აღნიშნული ტერიტორია არასოდეს ყოფილა ბოტანიკური ბაღის საკუთრება.

,,დღეს, 17:00 საათზე დასრულდა თბილისის მერიის ქონების მართვის სააგენტოს მიერ გამოცხადებული აუქციონი. აუქციონზე გამოტანილი იყო ოქროყანის ტერიტორიაზე არსებული 29 ჰექტარი მიწის ნაკვეთი. აუქციონის პირობების თანახმად, გასაყიდი ტერიტორიის საწყისი ფასი 6 233 000 ლარს შეადგენდა. აუქციონში მონაწილეობა ერთმა პრეტენდენტმა მიიღო. გაყიდული ქონების ფასმა 6 326 495 ლარი შეადგინა. ამ ეტაპზე მიმდინარეობს კანონით გათვალისწინებული პროცედურები.

აუქციონში გამარჯვებული ვალდებულია სამშენებლო ნებართვის აღებიდან არაუგვიანეს 36 თვის ვადაში, მაგრამ ხელშეკრულების გაფორმებიდან არაუგვიანეს 48 თვის ვადაში, განახორციელოს 80 ნომრიანი სასტუმრო კომპლექსის მშენებლობა, რომლის განაშენიანების ფართი უნდა იყოს არაუმეტეს 20 000 კვ.მ. აუქციონში გამარჯვებულმა უნდა განახორციელოს გადაცემულ მიწის ნაკვეთზე მწვანე ნარგავების მოვლა-პატრონობა, განახლება, ტერიტორიის კეთილმოწყობა, რეკრეაციული სივრცის განვითარება და საირიგაციო სისტემის მოწყობა.

მაღალი საზოგადოებრივი ინტერესებიდან გამომდინარე, განვმარტავთ, რომ აღნიშნული ტერიტორია არასდროს ყოფილა ბოტანიკური ბაღის საკუთრება“ - ნათქვამია მერიის განცხადებაში.