თბილისის მერიის თანამშრომელმა თანამდებობა დატოვა. ნინო ქაცარავა განათლების, სპორტისა და კულტურის სამსახურის მთავარი სპეციალისტის თანამდებობაზე მუშაობდა.

გადაწყვეტილების მიზეზად ქაცარავამ მერიასთან შეკრებულ ჟურნალისტებთან ბიძინა ივანიშვილი დაასახელა.

მისი თქმით, თბილისის მერია მხოლოდ ყოფილი პრემიერის სურვილებს ასრულებს.

"სასამართლოს ძალით ერთი წლის წინ აღმადგინეს სამსახურში, მანამდე უკანონოდ გათავისუფლებული ვიყავი, მაგრამ დღეს, როცა ამ მოვლენებს ვუყურებ, თუ როგორ გაიყიდა ბოტანიკური ბაღი, ეს ნიშნავს, რომ თბოლისის მერია ფიქრობს მხოლოდ იმაზე, რომ როგორმე ბიძინა ივანიშვილს აუსრულოს სურვილები, მისი საზრუნავი არ არის ხალხი, თბილისი და სოციალურად დაცუველები, ამიტომ მე დღეს ვტოვებ თბილისის მერიას"-განაცხადა ქაცარავამ.

კრწანისი-შინდისის მშენებარე გზის მიმდებარედ 29 ჰექტარი მიწა 6 326 495 ლარად გაიყიდა. მასში მონაწილეობა მხოლოდ ერთმა კომპანიამ მიიღო. ოპოზიციის თქმით, ბოტანიკური ბაღის მსგავსად აღნიშნული ტერიტორია ბიძინა ივანიშვილმა შეიძინა.