ზღვისუბნის დასახლება დახმარებას ითხოვს - ირაკლი ალასანია მოსახლეობას შეხვდა

პოლიტიკა - 15:22, 03 May, 2016

3183

დღეს, ‘’თავისუფალი დემოკრატების“ ლიდერი ირაკლი ალასანაია და გიორგი ცაგარეიშვილი ლოტკინის მთაზე, ზღვისუბნის დასახლებაში მცხოვრებლებს შეხვდნენ. ირაკლი ალასანია მოქალაქეების თხოვნით მივიდა. მან მაცხოვრებლებისგან პირადად მოისმინა არსებული პრობლემები.

2003 წლიდან ლოტკინის მთაზე, ზღვისუბნის დასახლებაში 2 კორპუსში ცხოვრობს 55ოჯახი.

წლების განმავლობაში სახელმწიფოსგან მიღებული ნებართვების საფუძველზე მაცხოვრებლებმა დაიწყეს მოშლილი და ამორტიზებული ინფრასტრუქტურის განვითარება, საკუთარი ხარჯებით. გაიყვანეს დენი (შეიძიბნეს ტრანსფორმატორი), წყალი და გზა; მოაწესრიგეს საკანალიზაციო სისტემა, გაარემონტეს დანგრევისპირას მისული კორპუსები, გადახურეს სახურავი და გამართეს სანიაღვრე სისტემა. ყველა ეს ხარჯი აქ მცხოვრებმა ოჯახებმა საკუთარი სახსრებით და შემოსავლებიდან დაფარეს.

ოჯახების უმეტესობა ამ ტერიტორიაზე 13 წელია ცხოვრობს.

მოსახლეობის განცხადებით, 2013 წლიდან რაიონის გამგეობამ და სხვა არაუფლებამოსულმა სახელმწიფო სტრუქტურებმა, მოქმედი კანონის უხეში დარღვევით დაიწყო არსებული საცხოვრებელი ფართების სხვადასხვა ოჯახებზე გაცემა, რომლებიც ‘’მეტრომშენის’’ და ‘’გვირაბმშენის’’ თანამშრომლები არიან. ადგილობრივების თქმით, ნაძალადევის რაიონის გამგეობა გასცემს საკუთრების მოწმობას ქონებაზე, რომელიც მას არ ეკუთვნის. ზღვისუბნის მაცხოვრებლების განცხადებით, რეალურად აღნიშნული კორპუსები ეკონომიკის სამინისტროს ბალანსზეა და ერთადერთი უფლებამოსილი განმკარგველი, ეკონომიკის სამინისტროს სახელმწიფო ქონების ეროვნული სააგენტოა.

მოსახლეობის განცხადებით, გამგეობის მიერ ქონების საკუთრებაზე მოწმობის გაცემის საკითხზე 2015 წლის 10 დეკემბერს აღიძრა სისხლის სამართლის საქმე. საქმე წარმოებაში ჩაეშვა, როგორც ნაძალადევის გამგეობის თანამშრომელთა მიერ დოკუმენტების გაყალბების შესაძლო ფაქტზე, თუმცა გამოძიება უშედეგოდ დასრულდა.

მიუხედავად არსებული სიტუაციისა, გამოსახლების პროცესი არ შეჩერებულა, ბოლოს ძალისმიერი მეთოდით გამოსახლებულ იქნა, საქართველოს ეროვნული გმირის ზურაბ აბულაძის დედა, ლუდმილა გორინა.

(ზურაბ აბულაძე 1993 წლის 21 სექტემბერს დაიჭრა სოფელ ტამიშთან სხვა მებრძოლებთან ერთად და ბრძოლის ველიდან ვერ გამოაღწია; მისი გადმოსვენება ბაბუშერას სამარხის გახსნის შედეგად მოხდა. ზურაბ აბულაძის ნეშთი იდენტიფიცირებულია).

ამჟამად მიმდინარეობს სასამართლო პროცესები სადაო ქონებასთან დაკავშირებით.

‘’ზღვისუბნის ეს ორი კორპუსი არის ნათელი მაგალითი იმის, როგორ ვერ თანხმდებიან სახელმწიფოს უწყებები - ეკონომიკის სამინისტრო და გამგეობა ერთმანეთში, თუ როგორ მოუძებნონ ამ პრობლემას გადაწყვეტა. მიტოვებულია ბედის ანაბარა ეს ორმოცდაათამდე ოჯახი. ისინი 13 წლის განმავლობაში აქ ცხოვრობდნენ, აშენებდნენ ამ ყველაფერს. არაფერი დახვედრიათ აქ. დღეს, მათ კანონიერ უფლებებს სასამართლოც და ხელისუფლებაც არ აღიარებს. ჩვენ, ‘’თავისუფალ დემოკრატებს’’ გვაქვს კონკრეტული გეგმა, რომ ადგილობრივი ბიუჯეტიდან გამოიყოს 50 000 000 რათა მოხდეს სპეციალური საცხოვრისების აშენება და სოციალურად დაუცველ ფენას ვისაც ძალიან ჭირდება მათი დაკმაყოფილება’’, - განაცხადა ირაკლი ალასანიამ.