საქართველოს სახელმწიფო მინისტრი ევროატლანტიკურ სტრუქტურებში ინტეგრაციის საკითხებში, დავით ბაქრაძე რუსეთის საგარეო მინისტრის განცხადებას ეხმაურება. ლავროვის პასუხად, ბაქრაძემ აღნიშნა, რომ საქართველოსა და ნატო-ს მოქმედებები არავის წინააღმდეგ არ არის მიმართული.

„საქართველოს, ისევე, როგორც ზოგადად ალიანსის მოქმედებები არ არის მიმართული არავის წინააღმდეგ. ეს ელემენტარული ჭეშმარიტებაა, რომელსაც, რუსული მხარეც, იმედია პროვოკაციისთვის არ გამოიყენებს“, - განაცხადა ბაქრაძემ.

„კრემლისთვის ნატო-ს გაფართოება მიუღებელია. ნატო-ს სამხედრო ბაზების განთავსებას საზღვრებთან, მოსკოვი სამხედრო ზომებით უპასუხებს“, - ასეთ განცხადებას რუსეთის ფედერაციის საგარეო საქმეთა მინისტრი, სერგეი ლავროვი შვედურ მედიასთან აკეთებს. რუსეთის მთავარი დიპლომატი, მსგავსი განცხადებით ეხმაურება შვედეთის ჩრდილო ატლანტიკურ ალიანსში გაწევრიანების გეგმებს.