საპარლამენტო ოპოზიციის შეფასებით, IRI-ს კვლევა ქვეყანაში არსებული ვითარების ადეკვატურია. საერთაშორისო რესპუბლიკური ინსტიტუტის კვლევას უმრავლესობა არ ენდობა. მათი თქმით, მსგავსი ორგანიზაციები „ნაციონალური მოძრაობის“ ინტერესებს ემსახურებიან. მმართველი გუნდის ნაწილი მიიჩნევს, რომ ამ კვლევის მიზანი შესაძლოა არჩევნების შედეგების ეჭვქვეშ დაყენება იყოს.

„მსგავსი ორგანიზაციები ორკესტრირებულად მუშაობენ „ნაციონალურ მოძრაობაზე“ იმ არასამთავრობო ორგანიზაციებთან ერთად, რომლებიც უცხოეთიდან ფინანსდებიან. ჩემი აზრით, არის იმის მცდელობა, რომ შემოდგომაზე მოხდეს ამ არჩევნების წაგების შემთხვევაში, რომელიც ისედაც გარანტირებული აქვს „ნაციონალურ მოძრაობას“, ეჭვქვეშ დაყენება“, - განაცხადა თამაზ მეჭიაურმა.

ჩიორა თაქთაქიშვილი კი მიიჩნევს, რომ „ქართული ოცნების“ მმართველობის მეოთხე წელს, ქვეყანაში ყველაზე უარესი სიტუაციაა. საპარლამენტო უმცირესობის წევრი აღნიშნავს, რომ ეს ყოველივე 2016 წლის არჩევნებით უნდა დასრულდეს:

„საქართველოს მოქალაქეები საკუთარ თავზე გრძნობენ იმას, აბსოლუტური უმრავლესობა, რომ საქართველო ვითარდება ცუდი მიმართულებით. პირველ რიგში, საუბარია გაუგონარ სიღარიბეზე, ფასების ინფლაციაზე, გაზრდილ გადასახადებზე. „ქართული ოცნებ“-ის მეოთხე, ე.წ. საუკეთესო წელს, არის ყველაზე გაუარესებული მდგომარეობა და ეს ყველაფერი უნდა დასრულდეს 2016 წელს, არჩევნებით“, - განაცხადა ჩიორა თაქთაქიშვილმა.

„თავისუფალი დემოკრატები“ კი მიიჩნევენ, რომ IRI-ს კვლევის შედეგები ადეკვატურია იმ ვითარებისა, რაც დღეს ქვეყანაში არსებობს:

„კვლევები, რომლებიც გამოქვეყნდა IRI-ს მხრიდან, არის სავსებით ადეკვატური იმ ტენდენციებისა, რომელიც ქვეყანაში არსებობს. სხვაობა, რომელიც არსებობს ჩვენსა და სხვა ოპოზიციურ პარტიებსა თუ მმართველ გუნდს შორის, არის მარტივად დასაძლევი 6 თვის განმავლობაში, მითუმეტეს იმ პირობებში, რომ საქართველოს მოსახლეობის აბსოლუტური უმრავლესობა, 70% თვლის - ქვეყანა არასწორი მიმართულებით ვითარდება“, - განაცხადა ირაკლი ჩიქოვანმა.