„რესპუბლიკელი“ დავით ბერძენიშვილის შეფასებით შესაძლებლობა იმისა, რომ საარჩევნო მოდელის ცვლილება 2016 წლის არჩევნებამდე მოხდეს, ძალიან დაბალია. აღნიშნული განცხადება ბერძენიშვილმა საქართველოს პარლამენტში საარჩევნო სისტემის ცვლილებასთან დაკავშირებით განხილვების დაწყებამდე გააკეთა. დრეს პარლამენტში ორი პროექტის განხილვა იგეგმება, პირველი ოპოზიციური პოლიტიკური გაერთიანებების მიერ არის შემუშავებული და 2016 წლის არჩევნებისთვის 75 სადეპუტატო მანდატის - პროპორციული წესით, ხოლო 75-ის სამხარეო-პროპორციული წესით გადანაწილებას გულისხმობს. მეორე პროექტის ავტორი კი უმრავლესობაა და 2016 წლის შემდგომი არჩევნებისთვის მაჟორიტარული საარჩევნო სისტემის გაუქმებასა და მრავალმანდანტიანი პროპორციული სისტემის ამოქმედებას ითვალისწინებს:

„ერთის კარგია შინაარსი , მეორის კარგია ვადა. საუკეთესო იქნებოდა ჩვენი ვერსია 2016 წელს ამუშავებულიყო, მაგრამ ამის შესაძლებლობა ძალიან დაბალია, იმიტომ რომ ყველაფერი თვლითაა, პოლიტიკა კოპრომისების შესაძლებლობაა. პარტია „ქართული ოცნების“ წევრებს არ აუღიათ ვალდებულება 2012 წელს რეგიონულ-პროპორციული სისტემის ახლავე ასამუშავებლად“ - განაცხადა დავით ბერძენიშვილმა.

ამ დროისთვის საქართველოს პარლამენტში საარჩევნო სისტემის ცვლილებასთან დაკავშირებით ოპოზიციური პოლიტიკური გაერთიანებების მიერ შემუშავებული პროექტის განხილვა მიმდინარეობს, რომელიც პარლამენტს 200 ათასი ხელმოწერის საფუძველზე წარედგინა.

პროექტის მიხედვით, გათვალისწინებულია პარლამენტის დაკომპლექტება ერთიანი პროპორციული სისტემით არჩეული და სამხარეო პროპორციული სისტემით არჩეული პარლამენტის წევრებისგან. ოპოზიციის საკონსტიტუციო ცვლილებები 2016 წლის არჩევნებისთვის 75 სადეპუტატო მანდატის - პროპორციული წესით, ხოლო 75-ის სამხარეო-პროპორციული წესით გადანაწილებას გულისხმობს.

საკონსტიტუციო ცვლილებების პროექტს დეპუტატებს „ახალი მემარჯვენეების“ ლიდერი მამუკა კაციტაძე აცნობს.