თურქეთისთვის ტერიტორიის გადაცემის შესახებ ინფორმაცია სინამდვილეს არ შეესაბამება- საქართველოს საგარეო უწყება

პოლიტიკა - 19:54, 27 Apr, 2016

3301

საქართველოს მიერ თურქეთის რესპუბლიკისთვის ტერიტორიის გადაცემასთან დაკავშირებით მედიაში გავრცელებულ ინფორმაციას საქართველოს საგარეო სამინისტრო ეხმაურება. უწყების ინფორმაციით აღნიშნული ინფორმაცია სინამდვილეს არ შეესაბამება, საქართველოსა და თურქეთის რესპუბლიკას შორის სახელმწიფო საზღვრის დელიმიტაცია -დემარკაცია დასრულდა საბჭოთა კავშირის პერიოდში, მე-20 საუკუნის 70-იან წლებში. 1992 წელს მხარეებმა აღიარეს ადრე შეთანხმებული საზღვრის ხაზი. აქედან გამომდინარე, დღეს საზღვართან და მის ცვლილებასთან დაკავშირებით რაიმე სახის მოლაპარაკებები და შეთანხმება გამორიცხულია.

"ბუნებრივი პირობების ზემოქმედების შედეგად სასაზღვრო მდინარე ჯაყისწყალმა შეიცვალა კალაპოტი. ამჟამად ორ სასაზღვრო მდინარეზე - ჯაყისწყალი და ქარზამეთისწყალი ხორციელდება სამუშაოები ორ მონაკვეთზე შეცვლილი კალაპოტის პირვანდელ მდგომარეობაში მოყვანის მიზნით. აღნიშნული მდინარეების ბუნებრივი კალაპოტების აღდგენა ხდება 1973 წლის საზღვრის რედემარკაციის მასალების მიხედვით. საკითხი სავარაუდოდ მას შემდეგ მოექცა თურქული მედიის ყურადღების ცენტრში, რაც 2016 წლის 20 აპრილს გაიმართა ექსპერტთა მორიგი შეხვედრა, რომლის ფარგლებშიც მხარეებმა მოინახულეს თურქეთის რესპუბლიკის არდაჰანის პროვინციაში, სოფელ იურთბექლერის მიმდებარედ სასაზღვრო მდინარე ჯაყისწყლის აღსადგენი კალაპოტი, სადაც სპეციალისტებმა აღსადგენი კალაპოტის ღერძი დაკვალეს სათანადო ხელსაწყოების გამოყენებით, რედემარკაციის მასალებით განსაზღვრული კოორდინატების შესაბამისად. ანალოგიური სამუშაოების ჩატარება უახლოეს მომავალში იგეგმება მდინარე ქარზამეთისწყალზე."-ნათქვამია საქართველოს საგარეო უწყების ინფორმაციაში.

საქართველოს მიერ თურქეთისთვის სასაზღვრო რაიონში 6 ჰექტარი მიწის გადაცემის შესახებ ინფორმაცია გამოცემა Daily Sabah-მა გაავრცელა.