საქართველოს პარლამენტის თავმჯდომარე, დავით უსუფაშვილი ვიზიტით ბრიუსელში იმყოფება, სადაც შეხვედრა ევროპარლამენტის პრეზიდენტთან, მარტინ შულცთან გამართა.

შეხვედრის დასრულების შემდეგ, დავით უსუფაშვილმა და მარტინ შულცმა ერთობლივი პრესკონფერენცია გამართეს.

„ვიზალიბერლიზაციის პროცესში არ არის არანაირი წინაპირობები და დამატებითი პროცესები, პროცესი გეგმის მიხედვით მიმდინარეობს. ეს ყველაფერი დროს მოითხოვს. ვიმედოვნებ, რომ პროცესი შეუფერხებლად წარიმართება და საქართველოს მთავრობისა და ხალხის მიღწევები იქნება აღიარებული. ჩვენ კარგად გვესმის თუ რამდენად მნიშვნელოვანია ამ პროცესის დასრულება. ევროპაში თავისუფლად გადაადგილება არა მხოლოდ საქართველოსთვის იქნება სასარგებლო, არამედ ევროპისთვისაც. სწორ გზაზე ვდგავართ და ალბათ ამ გზაზე ძალიან ბევრი რამ არის გასაკეთებელი. მათ შორის რეფორმები სასამართლო სისტემაზე, ასევე ბევრია სამუშაო იმაზე, რომ ჩვენმა ქვეყანამ ბევრი ინვესტორი მოიზიდოს, მე საქართველოში დავბრუნდები კიდევ ერთი პოზიტიური გზავნილით, ახალი ენთუზიაზმით და მოხარული ვარ, რომ ბატონმა პრეზიდენტმა მიიღო ჩვენი მოპატიჟება და გეგმავს, საქართველოს უახლოეს თვეებში ესტუმროს. მჯერა, რომ როდესაც თქვენ საქართველოში ჩამოხვალთ, კარგ ამბებს ჩამოგვიტანთ ევროპარლამენტიდან და თქვენც ბევრ პოზიტიურ რამეს დაინახავთ ჩვენს ქვეყანაში“, - განაცხადა საქართველოს პარლამენტის თავმჯდომარემ ერთობლივ პრესკონფერენციაზე.