ქიბარ ხალვაშის ადვოკატი პაატა სალია რუსთავი 2-ის მხარის შუამდგომლობას, რომელიც ითვალისწინებს მოსამართლე ნათია გუჯაბიძის აცილებას, არარეალურს უწოდებს. მას იმედი აქვს, რომ სასამართლო ამ შუამდგომლობას არ დააკმაყოფილებს:

„რუსთავი 2-ის დამფუძნებლების სურვლია არ განხორციელდეს მართლმსაჯულება, რომ ჩემმა მარწმუნებელმა ვერ შეძლოს კანონით გათვალსიწინებული უფლებების დაცვა სასამართლოში. ეს შუამდგომლობა იყო აბსურდული და ყოველგვარ საფუძველს მოკლებული. ძირითადად იყო აგებული გაურკვეველ მოსაზრებებზე.

წინა სხდომაზე, 21 აპრილს, მათ დააყენეს ასეთი შუამდგომლობა, რომლის დაკმაყოფილების სამართლებრივი საშუალებები საერთოდ არ არსებობდა და ეს გაკეთდა იმიტომ, რომ დღეს მოსამართლის აცილების საკითხი დაეყენებინათ, თუ მათ რაიმე პრეტენზია ჰქონდათ ნათია გუჯაბიძესთან, რომ იგი და ურთმელიძე ერთი ორგანიზაციის წევრები არიან და ამას შეიძლება რაიმე ზეგავლენა მოეხდინა, მათთვის ეს დიდი ხნით ადრე იყო ცნობილი და შეეძლოთ ადრე გაესაჩივრებინათ“, - განუცხადა „ნიუპოსტს“ პაატა სალიამ.