ტერიტორია, სადაც კრწანისი-შინდისის გზა უნდა აშენებულიყო მერიას აუქციონზე გააქვს

პოლიტიკა - 13:28, 27 Apr, 2016

1856

ბოტანიკური ბაღის მახლობლად მდებარე ტერიტორია სადაც კრწანისი-შინდისის დამაკავშირებელი გზა უნდა აშენებულიყო დედაქალაქის მერიას აუქციონზე გააქვს. ტერიტორიის ფართობი 29,7 ჰექტარია, საწყისი ფასი კი 6 233 000 ლარი.

შესყიდვის პირობებში ნათქვამია, რომ აუქციონში გამარჯვებული ვალდებულია: 1) სამშენებლო ნებართვის აღებიდან არაუგვიანეს 36 (ოცდათექვსმეტი) თვის ვადაში, მაგრამ ხელშეკრულების გაფორმებიდან არაუგვიანეს 48 (ორმოცდა რვა) თვის ვადაში განახორციელოს არანაკლებ 80 (ოთხმოცი) ნომრიანი სასტუმრო კომპლექსის მშენებლობა, რომლის განაშენიანების ფართი, გარდა ტექნიკური/დამხმარე ფართისა, უნდა იყოს არაუმეტეს 20000 (ოცი ათასი) კვ.მ. 2) სასტუმრო კომპლექსისთვის უზრუნველყოს არანაკლებ 50 (ორმოცდაათი) ერთეულ სატრანსპორტო საშუალებაზე გათვლილი ავტოსადგომის მოწყობა. 3) ხელშეკრულების გაფორმებიდან სააუქციონო პირობების (ვალდებულებების) შესრულებამდე პერიოდის განმავლობაში, პროექტის ფარგლებში განახორციელოს გადაცემულ მიწის ნაკვეთზე მწვანე ნარგავების მოვლა-პატრონობა, განახლება (ახალი ხე-ნარგავების შერგვა), ტერიტორიის კეთილმოწყობა, რეკრეაციული სივრცის განვითარება და საირიგაციო სისტემის მოწყობა.