გურჯაანის გამგეობაში მომხდარი ინცინდენტში მონაწილე საჯარო მოხელე თანამდებობიდან გათავისუფლდა

პოლიტიკა - 18:05, 26 Apr, 2016

3992

გურჯაანის მუნიციპალიტეტის გამგეობაში მომხდარი ინცინდენტის მონაწილე მანანა ჯანჯიბუხაშვილი სამსახურიდან გაათავისუფლდა.
სოციალური სამსახურის სპეციალისტის სამსახურიდან გათავისუფლების ფაქტი "ნიუპოსტს" გამგეობის პრესსამსახურმა დაუდასტურა.
"მიმდინარე წლის 21 აპრილს, გურჯაანის მუნიციპალიტეტის გამგეობის საფინანსო-საბიუჯეტო, ჯანდაცვისა და სოციალურ საკითხთა სამსახურის ჯანდაცვისა და სოციალურ საკითხთა განყოფილების უფროს სპეციალისტ მანანა ჯანჯიბუხაშვილსა და მოქალაქე ეკატერინე პეტრიაშვილს შორის მომხდარი კონფლიქტის გამო, გურჯაანის მუნიციპალიტეტის გამგეობის შიდა აუდიტის სამსახურის მოკვლევის შედეგად მიღებული დასკვნის საფუძველზე, მანანა ჯანჯიბუხაშვილის მიერ საჯარო მოსამსახურისთვის შეუფერებელი საქციელისა და დისციპლინური გადაცდომის გამო, გურჯაანის მუნიციპალიტეტის გამგებელმა მისი თანამდებობიდან გათავისუფლების გადაწყვეტილება მიიღო"- აცხადებენ გურჯაანის მუნიციპალიტეტის გამგეობაში.

გურჯაანის მუნიციპალიტეტის გამგეობაში მომხდარი კონფლიქტის შემდეგ 46 წლის ეკატერინე პეტრიაშვილი გარდაიცვალა.

მარტოხელა ქალბატონი გურჯაანის გამგეობაში, მედიკამენტების შესაძენად აუცილებელი თანხის გამოყოფის სათხოვნელად, სოციალური სამსახურის სპეციალისტთან იყო მისული.

მანანა ჯანჯიბუხაშვილთან კონფლიქტის შემდეგ, კი ქალბატონმა ინფარქტი მიიღო და საავადმყოფოში გადაყვანიდან რამდენიმე წუთში გარდაიცვალა.

საზოგადოების ნაწილი და გარდაცვლილის ოჯახის წევრები, გურჯაანის მუნიციპალიტეტის გამგეობის სოციალური სამსახურის სპეციალისტის დასჯას ითხოვენ.