ევროპარლამენტის სამოქალაქო თავისუფლებათა, მართლმსაჯულებისა და საშინაო საქმეთა კომიტეტში საქართველოსთვის ვიზალიბერალიზაციის საკითხზე მოხსენების წარდგენისას, ევროპარლამენტის წევრმა მარია გაბრიელიმ საქართველოს ვიზალიბერალიზაციის მნიშვნელობაზე ისაუბრა. მარია გაბრიელის მოხსენებას ზვიად კვაჭანტირაძემ უპასუხა და აღნიშნა, რომ საქართველო ელოდება ევროპულ ოჯახში ადგილს, რომელსაც იგი ყოველთვის ეკუთვნოდა:

„ქალბატონი მომხსენებელი მართალია, მთავარი მოქალაქეების ინტერესებია. საქართველო ყოველთვის იყო ევროპის ნაწილი და თავის ვექტორად ირჩევდა ევროპას. ჩვენი ლიდერები ყოველთვის აცნობიერებდნენ, რომ ქვეყნის დაცვა და გნვითარება შესაძლებელი იყო ევროპისკენ სიარულის გზით. იმ წარმატებას, რომელიც მომავალში გველის ფესვები აქვს წარსულში, ისტორიაში, ჩვენი მთავრობის მიღწევებმა ამ მიზანთან მიგვაახლოვა. ჩვენ გვჯერა გამარჯვების და თქვენი მხარდაჭერის იმედი გვაქვს. ათასობით მოქალაქე საქართველოში, ქვეყნის მთელ ტერიტორიაზე ელოდება ამ შეხვედრას ამ დარბაზში და ელოდება ადგილს იმ ოჯახში, რომელსაც საქართველო ყოველთვის ეკუთვნოდა“, - განაცხადა ზვიად კვაჭანტირაძემ.

შეგახსენებთ, რომ მარია გაბრიელიმ საქართველოს ვიზალიბერალიზაციის მნიშვნელობაზე ისაუბრა და განაცხადა, რომ ეს ყოველივე პირველ რიგში, მოქალაქეთა ინტერესების დაცვას უნდა ემსახურებოდეს:

„საქართველომ აჩვენა მნიშვნელოვანი პროგრესი ვიზალიბერალიზაციის სამოქმედო გეგმის შესრულებისას. ვაფასებთ საქართველოს მიერ გატარებულ რეფორმებს, მათ შორის მიგრაციის, თავშესაფრის პოლიტიკის, ფულის გათეთრების, კორუფციის კუთხით, ევროკომისიამ თქვა, რომ ჩვენ უნდა დაგვენახა საქართველოს პროგრესი, ამავე დროს მსურს დავუსვა კითხვები კომისიას, შეუძლია თუ არა გვითხრას, როგორია ვიზებზე უარის თქმის მონაცემები. ჩვენ ვიცით, რომ უარყოფილი ვიზების რაოდენობა უნდა მცირდებოდეს და ეს მნიშვნელოვანია. ვფიქრობ, ჩვენ გამოწვევები შესაძლებლობებად უნდა ვაქციოთ. როდესაც ვსაუბრობთ ვიზებზე, პირველ რიგში მოქალაქეებზე უნდა ვიფიქროთ. მათი ინტერესი ყველაზე მთავარია“, - განაცხადა მარია გაბრიელიმ.