ევროპარლამენტის სამოქალაქო თავისუფლებათა, მართლმსაჯულებისა და საშინაო საქმეთა კომიტეტში საქართველოსთვის ვიზალიბერალიზაციის საკითხზე მოხსენების წარდგენისას, ევროპარლამენტის წევრმა მარია გაბრიელიმ საქართველოს ვიზალიბერალიზაციის მნიშვნელობაზე ისაუბრა და განაცხადა, რომ ეს ყოველივე პირველ რიგში, მოქალაქეთა ინტერესების დაცვას უნდა ემსახურებოდეს:

„საქართველომ აჩვენა მნიშვნელოვანი პროგრესი ვიზალიბერალიზაციის სამოქმედო გეგმის შესრულებისას. ვაფასებთ საქართველოს მიერ გატარებულ რეფორმებს, მათ შორის მიგრაციის, თავშესაფრის პოლიტიკის, ფულის გათეთრების, კორუფციის კუთხით, ევროკომისიამ თქვა, რომ ჩვენ უნდა დაგვენახა საქართველოს პროგრესი, ამავე დროს მსურს დავუსვა კითხვები კომისიას, შეუძლია თუ არა გვითხრას, როგორია ვიზებზე უარის თქმის მონაცემები. ჩვენ ვიცით, რომ უარყოფილი ვიზების რაოდენობა უნდა მცირდებოდეს და ეს მნიშვნელოვანია. ვფიქრობ, ჩვენ გამოწვევები შესაძლებლობებად უნდა ვაქციოთ. როდესაც ვსაუბრობთ ვიზებზე, პირველ რიგში მოქალაქეებზე უნდა ვიფიქროთ. მათი ინტერესი ყველაზე მთავარია“, - განაცხადა მარია გაბრიელიმ.

ევროპარლამენტის წევრი, საჯად კარიმიც იზიარებს კოლეგის პოზიციას და აღნიშნავს, რომ ამ საკითხში მთავარი მოქალაქეთა ინტერესებია და ვიზალიბერალიზაციის საკითხის გადადება მოსახლეობისთვის ცუდი იქნება:

„ევროკომისიამ აღნიშნა, რომ საქართველომ შეასრულა თავისი ვალდებულებები და როგორც ჩემი კოლეგა, მადამ გაბრიელი აღნიშნავს, მთავარი, მოქალაქეები არიან და ვფიქრობ, რომ ნებისმიერი გადადება იქნება ცუდი მოქალაქეებისათვის. განსაკუთრებით ისეთ რეგიონებში, როგორიცაა სამხრეთ ოსეთი. საქართველოს ტერიტორიული მთლიანობისა და სუვერენიტეტის მხარდაჭერის კუთხით. იმედი მაქვს, მომხსენებელიც მხარ დაუჭერს იმ მიდგომას, რომელიც მე მაქვს ვადებთან დაკავშირებით“, - განაცხადა საჯად კარიმიმ.