ევროპარლამენტში ამ წუთებში ევროკავშირთან საქართველოს ასოცირების საპარლამენტო კომიტეტის სხდომა მიმდინარეობს, რომელსაც საკანონმდებლო და აღმასრულებელი ხელისუფლების წარმომადგენლები ესწრებიან.

სხვადასხვა უწყების პირველი პირები სხდომაზე მოხსენებით გამოვლენ და დეპუტატებს გააცნობენ იმ რეფორმებს, რომლებიც ასოცირების ხელშეკრულებიდან გამომდინარე განხორციელდა. დღევანდელ კომიტეტზე ასევე საქართველოსა და ევროკავშირს შორის არსებული ურთიერთობები განიხილება.

„საპარლამენტო ასოცირების კომიტეტი, ეს არის ორმხრივი ფორმატი ევროკავშირსა და საქართველოს შორის, მაგრამ ფორმალურად სავალდებულო ძალა არ აქვს ამ კომიტეტის გადაწყვეტილებებს და ერთგვარად გასაკვირია, რომ ასეთი დიდი რაოდენობით მაღალი თანამდებობის პირები საქართველოდან ჩამოდიან, წევენ სამივლინებო ხარჯებს, როცა ფორმალური გადაწყვეტილება აქ არ მიიღება. მნიშვნელობა იმას კი არ აქვს რას იტყვის თეა წულუკიანი თუ რომელიმე სხვა მინისტრი, რომელიღაც კომიტეტის სხდომაზე, მნიშვნელობა აქვს იმას, რა მოხდება ან არ მოხდება საქართველოში, მგონი ამას ვერ აცნობიერებენ ჩვენი მინისტრები“, - განაცხადა გიორგი კანდელაკმა.