„ერთიანი ნაციონალური მოძრაობა“ სახელმწიფო უსაფრთხოების სამსახურის უფროსის პარლამენტში მისვლას ითხოვს. საპარლამენტო უმცირესობისთვის გაუგებარია თუ რატომ ჭიანურდება კანონით გათვალისწინებული ანგარიშის მოსმენა.

მმართველი გუნდის წევრების განცხადებით კი ვახტანგ გომელაური მზად არის წარსდგეს 2015 წლის ანგარიშით, თუმცა როდის, ეს არ არის ცნობილი.

„ანგარიში არის დღის წესრიგში შესული და ფაქტია, რომ საკომიტეტო სისტემამ განიხილა ეს ანგარიში, საკმაოდ მწვავე კითხვებიც დაისვა, პასუხებიც გაიცა, არავინ თავს არ არიდებს ამ ანგარიშის მოსმენას, შესაბამისად შეთანხმდება დრო, როდის იქნება შესაძლებელი, რომ ერთის მხრივ თავად იყოს ამისთვის მზად და მეორეს მხრივ პარლამენტის დღის წესრიგიდან გამომდინარე შევძლოთ ამ ანგარიშის მოსმენა, რომელიც ალბათ მთელ დღეს წაიღებს“, - განაცხადა მანანა კობახიძემ.