"ქართული ოცნების" კორცხელის მაჟორიტარი დეპუტატობის კანდიდატი „ნაციონალური მოძრაობის“ წევრია

პოლიტიკა - 14:22, 25 Apr, 2016

3983

"დაიცავი საქართველოს“ ხელმძღვანელი კახა მიქაია აცხადებს, რომ ზუგდიდის რაიონის სოფელ კორცხელში "ქართული ოცნების" მიერ წარდგენილი მაჟორიტარი დეპუტატობის კანდიდატი ამირან ლაგვილავა დღემდე "ნაციონალური მოძრაობის" წევრია.

მიქაია ირწმუნება, რომ ზუგდიდის გამგებელ ედიშერ თოლორაიას ამირან ლაგვილავას კანდიდატურის დასახელება, კუდის ყოფილმა მაღალჩინოსანმა რუსლან შამახიამ და სამეგრელო-ზემო სვანეთის ყოფილმა გუბერნატირმა თენგიზ გუნავამ მოსთხოვეს.

მიქაიამ დღეს ლაგვილავას ენმ-სთან კავშირის დასადასტურებლად, პარტიის წევრის მოწმობა წარდგინა, რომელიც 2013 წლით თარიღდება და რომელსაც მიხეილ სააკაშვილი და ვანო მერაბიშვილი აწერენ ხელს.

"ნაციონალურ მოძრაობის" ზუგდიდის ოფისის ინფორმაციით, ამირან ლაგვილავას პარტია ამ დრომდე არ დაუტოვებია, შესაბამისად ის ამ დრომდე ენმ-ს წევრად ითვლება.
ცნობილია, რომ საქართველოს მესამე პრეზიდენტმა მიხეილ სააკაშვილმა ამირან ლაგვილავა 2012 წელს ღირსების ორდენითაც დააჯილდოვა.
ამირან ლაგვილავა მაჟორიტარი დეპუტატობის კანდიდატად პირადად ვიცე-პრემიერმა კახა კალაძემ წარადგინა.
სოფელ კორცხელში შუალედური არჩევნების ჩატარება მას შემდეგ გახდა საჭირო, რაც 2015 წლის 6 ნოემბერს საკრებულომ ხმათა უმრავლესობით სოფლის მაჟორიტარ დეპუტატს, „თავისუფალი დემოკრატებიდან“ ცოტნე მურღულიას უფლებამოსილება შეუწყვიტა.
მიზეზი ამ უკანასკნელის მიერ სხდომების გაცდენა გახდა. საკრებულოს შუალედური არჩევნები 22 მაისს გაიმართება.