ცვლილებები მერიაში - ისნის, სამგორისა და გლდანის რაიონების გამგებლები თანამდებობას ტოვებენ?

პოლიტიკა - 12:30, 25 Apr, 2016

3376

დედაქალაქის მერია საკადრო ცვლილებებია მოლოდინშია. ოპოზიციის ინფორმაციით,თანამდებობას მერიის რამდენიმე მაღალჩინოსანი დაემშვიდობება, ცვლილებები მოხდება თბილისის რაიონების გამგეობებშიც.

ცნობილია, რომ პარასკევს თბილისის მერმა დავით ნარმანიამ საკრებულოში, უმრავლესობის წევრებთან შეხვედრა გამართა, რომელზეც სავარაუდოდ მოსალოდნელი ცვლილებების შესახებ აცნობეს "ქართული ოცნების" წევრებს.

გავრცელებული ინფორმაციით, თანამდებობებს ისნის, სამგორისა და გლდანის რაიონების გამგებლები ტოვებენ. ასევე არ არის გამორიცხული ცვლილება ზედამხედველობის საქალაქო სამსახურის ხელმძღვანელსაც შეეხოს.

თბილისის მუნიციპალიტეტის საკრებულოს სარევიზიო კომისიის თავმჯდომარე ნუგზარ მალაღურაძე მოსალოდნელ ცვლილებებს არ ადასტურებს, თუმცა იქვე აცხადებს, რომ ცვლილებები ბუნებრივი მომენტია.

"საკადრო ცვლილებების მოლოდინი არ არის, პარასკევს მერთან შეხვედრაზე პირადად ვიმყოფებოდი და ერთი სიტყვა არ თქმულა საკადრო ცვლილებებზე. ეს ბეჭედ დარტყმული ინფორმაცია"- აღნიშნა მალაღურაძემ.

საკრებულოს ფრაქცია "ნაციონალური მოძრაობა-თბილისის" თავმჯდომარე ირაკლი აბესაძე ამბობს, რომ დაგეგმილი ცვლილებები წინასაარჩევნო ხასიათისაა და ფასადური იქნება.

"ისნის, სამგორისა და გლდანის გამგებლების შეცვლა ნამდვილად ვერ შეცვლის მძიმე რეალობას. "ქართულ ოცნებაში" კორუმპირებული, საკუთარ თავზე მზრუნველი ჩინოვნიკები, ასე რომ ეს ცვლილებები ქალაქისთვის იქნება წარუმატებელი და მოსახლეობისთვის არაფრის მომცემი"- თქვა აბესაძემ.

"ნიუპოსტი" მოსალოდნელ საკადრო ცვლილებებზე დედაქალაქის მერიის პრესსამსახურს დაუკავშირდა. ნარმანიას უწყება გავრცელებულ ინფორმაციაზე ამ ეტაპზე განცხადებას არ აკეთებს.

ცნობისთვის, წინა კვირას თბილისის მერმა დავით ნარმანიამ ჟურნალისტებთან მერიაში გარკვეული ცვლილებების განხორციელება არ გამორიცხა.

„ არ გამოვრიცხავ, რომ გარკვეული ცვლილებები იყოს მერიის სისტემაში“, - განაცხადა დავით ნარმანიამ.