საქართველოს პრემიერ-მინისტრსა და გაერო-ს გენერალურ მდივანს შორის სატელეფონო საუბარი შედგა.

საქართველო არის კარგი მაგალითი ბევრი ქვეყნისთვის, - ამის შესახებ გაერო-ს გენერალურმა მდივანმა პან გი მუნმა საქართველოს პრემიერ-მინისტრ გიორგი კვირიკაშვილთან საუბრისას განაცხადა.

გაერო-ს გენერალური მდივანი საქართველოს მთავრობის მეთაურს დღეს ტელეფონით დაუკავშირდა და წუხილი გამოთქვა, რომ, დღის წესრიგის მოულოდნელი ცვლილების გამო, საქართველოში ვიზიტის გადადება მოუხდა.

პან გი მუნი მზად არის, მიმდინარე წლის განმავლობაში ეწვიოს საქართველოს, რათა პირადად გაეცნოს ქვეყნის მიერ დემოკრატიული და ეკონომიკური რეფორმების კუთხით მიღწეულ შთამბეჭდავ პროგრესს.

გაერო-ს გენერალურმა მდივანმა ჟენევის საერთაშორისო მოლაპარაკებების ფორმატში გაეროს აქტიური ჩართულობის მზადყოფნა გამოთქვა, რისთვისაც საქართველოს პრემიერ-მინისტრმა მას მადლობა გადაუხადა.

გიორგი კვირიკაშვილმა გამოხატა მზადყოფნა, პან გი მუნს მისთვის სასურველ დროს უმასპინძლოს საქართველოში.

მხარეებმა გამოთქვეს იმედი, რომ შეხვედრა ასევე შედგება გაერო-ს გენერალური ასამბლეის ფარგლებში.