"სახელმწიფომ გვაზავას და მის ოჯახს ტკივილი განუახლა, როცა დისკრეციის გამოყენება შეეძლო"- ზაზა ჭაია

პოლიტიკა - 18:30, 22 Apr, 2016

2138

"სამართალდამცველთა დაცვის ლიგის" წევრი, ზაზა ჭაია შინაგან საქმეთა მინისტრის ყოფილი მოადგილის ლევან გვაზავასთვის სასამართლოს მიერ 10 ათას ლარიანი გირაოს შეფარდების საკითხს ეხმაურება.

როგორც "ნიუპოსტს" ჭაიამ განუცხადა, სახელმწიფოს გვაზავას მიმართებაში კანონით გათვალისწინებული დისკრეციის უფლება უნდა განეხორციელებინა.

"გვაზავამ იმ ტრაგედიაზე რაც მას და მის ოჯახს დაატყდა განაჩენი საკუთარ თავს თვითონ გამოუტანა. მსგავსი ემოციური კომენტარი არასდროს მიმიცია, თუმცა მინდა ვთქვა, რომ იმ ტრაგედიის დროს უფალმა ეს განაჩენი არ მიიღო მისგან და მისცა უფლება თავისი და რეზოს შვილები აღზარდოს. დღეს კი ლევანს და გარდაცვლილის ოჯახს ეს დიდი ტკივილი განუახლეს. აღსანიშნავია, რომ დღევანდელ სასამართლოზე ლევანის და რეზოს ოჯახი ერთად მოვიდა, ისინი ერთიანები არიან. ჩემი ღრმა რწმენით ამ ემოციური სურათის შემხედვარე მოსამართლეს შერცხვა და დასთანხმდა სახელმწიფოს მოთხოვნას.

ქართულ სახელმწიფოს უნდა გამოეჩინა კეთილშობილება და ასეთი ღვაწლმოსილი პიროვნებისთვის არ შეეხსენებინა ოჯახური ტრაგედია. სახელმწიფოს დისკრეციის უფლება თავისუფლად შეეძლო გამოეყენებინა. მით უფრო რომ ყველა თანაგრძნობით იყო განწყობილი, როცა ერთი დეიდაშვილი გარდაიცვალა, მეორე კი სიკვდილს ებრძოდა. ამასთან, როცა არ არსებობს დაზარალებული, როცა გარდაცვლილის ოჯახი აცხადებს, რომ ეს ტრაგედიაა, ლევანი კი მათი შვილია, ამ შემთხვევაში სახელმწიფოს უნდა გამოეჩინა ჰუმანურობა, მით უფრო რომ ქართულ კანონმდებლობაში არის დისკრეციის უფლება ჩადებული. სახელმწიფოს გენერალ-მაიორი სასამართლოში კი არ უნდა მიეყვანა, არამედ უნდა უზრუნველყოს მისი მშვიდი ცხოვრება"- აღნიშნა ზაზა ჭაიამ.

შეგახსენებთ, რომ საქმე ეხება ოქროყანაში შარშან 28 აგვისტოს მომხდარ შემთხვევას, როდესაც გვაზავას ნათესავი რევაზ კალომლეწავი გარდაიცვალა, გვაზავამ კი თვითმკვლელობა სცადა. დღევანდელ პროცესზე ბრალდების მხარე 20 ათას ლარიან გირაოს ითხოვდა და როგორც პროკურორი აცხადებდა, არსებობდა ლევან გვაზავას მხრიდან საქმის მოწმეებზე ზეწოლის ალბათობაც თუმცა, სასამართლომ გადაწყვიტა 10 ათას ლარიანი გირაოს შეფარდება.