დიმიტრი ხუნდაძის ინიციატივით დაბერების პოლიტიკის დოკუმენტი შემუშავდა

პოლიტიკა - 16:06, 22 Apr, 2016

1297

დღეს საქართველოს პარლამენტში ჯანდაცვისა და სოციალურ საკითხთა კომიტეტის ინიციატივით, გაიმართა მეორე მულტისექტორული შეხვედრა, რომელზედაც წარმოდგენილი იქნა დაბერების პოლიტიკის დასრულებული სამოქმედო გეგმის დოკუმენტი. სამუშაო შეხვედრა გაიმართა გაეროს მოსახლეობის ფონდთან, აშშ საერთაშორისო განვითარების სააგენტოს დემოკრატიული მმართველობის ინიციატივის პროექტთან და საქართველოს დემოგრაფიული აღორძინების ფონდთან თანამშრომლობით. მულტისექტორულ ჯგუფს ხელმძღვანელობდა დიმიტრი ხუნდაძე.

-„სამუშაო ჯგუფმა და მასთან არსებულმა თემატურმა ქვეჯგუფებმა, რომელიც ჩვენი ხელმძღვანელობისთ შეიქმნა, მოსახლეობის დაბერების საკითხის მეინსტრიმინგის გზამკვლევისა და მისი რეკომენდაციების საფუძველზე შეიმუშავა 2016-2018 წლების ეროვნული სამოქმედო გეგმა, რომელიც უზრუნველყოფს მოსახლეობის დაბერების საკითხის ჩართვას სხვადასხვა სექტორულ პოლიტიკასა და პროგრამაში. ხანდაზმულების თემა ჩვენი ხელისუფლების ერთ-ერთი მთავარი საზრუნავია და ვცდილობთ, მათი რესურსი სრულყოფილად გამოვიყენოთ სახელმწიფოს მართვაში და ამასთანავე, შევუქმნათ მათ უკეთესი ცხოვრების პირობები. დაბერება არ არის განაჩენი, ეს გარდაუვალი დემოგრაფიული პროცესია, მაგრამ ამას სჭირდება სწორი პოლიტიკა. სწორედ ამ პოლიტიკის დოკუმენტზე იმუშავა ჯგუფმა თითქმის ერთი წელია, რომელსაც მალე პარლამენტის დადგენილებით მივიღებთ“.- განაცხადა დიმიტრი ხუნდაძემ.

-„დემოგრაფიულო პოლიტიკა მნიშვნელოვანი კომპონენტია ქვეყნის მდგრადი განვითარებისთვის. საქართველოში დემოგრაფიული დინამიკის ერთ-ერთი გამორჩეული მახასიათებელია დაბერების პროცესი, რაც განუხრელად გაიზრდება. ეს დინამიკა ქვეყნის წინაშე აყენებს გადაუდებელ ამოცანას - ერთი მხრივ, შეიქმნას ისეთი გარემო, რომელიც მოერგება ამ დემოგრაფიულ დინამიკას და უზრუნველყოფს უფროსი ასაკის მოქალაქეებისთვის საკმარის შემოსავალს, სოციალურ დაცვას და ასაკის საჭიროებაზე მორგებულ ჯანდაცვის სერვისებზე ხელმისაწვდომობას, და ამავდროულად, ხელს შეუწყობს უფროსი ასაკის მოქალაქეების, როგორც ინკლუზიური საზოგადოების წევრების მონაწილეობას ყველა სფეროში, ადამიანის ფუნდამენტური უფლებებით“.- განაცხადა , გაეროს მოსახლეობის ფონდის საქართველოს ოფისის ხელმძღვანელმა ლელა ბაქრაძემ.

-„ჩვენმა ფონდმა ჩაატარა სიღრმისეული კვლევები საქართველოში ერის დაბერების დინამიკასთან დაკავშირებით, რომელიც უკვე წარმოვადგინეთ კონფერენციაზე. ძალიან ხანგრძლივი და ნაყოფიერი შრომის შემდეგ პარლამენტს წარედგინა დაბერების პოლიტიკის დოკუმენტი, რომელიც არის სასიცოცხლოდ მნიშვნელოვანი ჩვენი ქვეყნისთვის. მნიშვნელოვანია ისიც, რომ დღევანდელმა ხელისუფლებამ რადიკალურად შეცვალა დამოკიდებულება ხანდაზმულების მიმართ. თუკი წინა ხელისუფლება მათ ჩარეცხილებს უწოდებდა, დღევანდელმა ხელისუფლებამ ხანდაზმულებს სპეციალური პოლიტიკური დოკუმენტი მიუძღვნა, სადაც მრავლადაა წარმოდგენილი საინტერესო ინიციატივები მათი ყოფის გასაუმჯობესებლად, ასვე, მათი როლის გასაძლიერებლად საზოგადოებრივ ცხოვრებაში. ბატონ დიმიტრი ხუნდაძის ხელმძღვანელობით ამ დოკუმენტის გასაცნობად, დაგეგმილი გვაქვს ხანადზმულებთან შეხვედრა როგორც დედაქალაქში, ასევე სხვა დიდ ქალაქებში“.- აღნიშნა დემოგრაფიული აღორძინების ფონდის თავმჯდომარე თამარ ჩიბურდანიძემ.

დღეს გამართულ სამუშაო შეხვედრაზე გამოითქვა შენიშვნები, რომელიც გათვალისწინებულ იქნება დოკუმენტის საბოლოო ვარიანტში. დაბერების პოლიტიკის დოკუმენტს პარლამენტი დადგენილებით მაისის ბოლომდე მიიღებს.