საქართველოს პრემიერ-მინისტრს ევროსაბჭოს საპარლამენტო ასამბლეაზე სიტყვით გამოსვლის შემდეგ, ტელეკომპანია „რუსთავი 2“-ის ირგვლივ მიმდინარე მოვლენებზე კითხა დაუსვეს, რაზეც პრემიერმა განაცხადა, რომ იგი ისურვებდა ტელეკომპანია ყოველთვის ისეთივე კრიტიკული და თავისუფალი იყოს, როგორც დღეს არის. პრემიერის პასუხს საპარლამენტო უმრავლესობის წარმომადგენელი, ლევან ბერძენიშვილი აფასებს:

„რუსთავი 2 არის ევროპაში ერთ-ერთი ყველაზე დმაოუკიდებელი და თავისუფალი ტელევიზია, რომელსაც არავითარი რეალური საფრთხე არ ემუქრება. ეს კარგია თუ ცუდი სხვა საკითხია, მაგრამ პირადად მე მიმაჩნია, პრემიერის პასუხი, რომ არანაირი საფრთხე რუსთავი 2-ს არ შეექმნება, ეს დამაჯერებელია, ასეც იქნება, გარწმუნებთ, არჩევნებამდე არაფერი არ მოხდება, არჩევნების შემდეგ სასამართლო გადაწყვეტილებები თუ ვინმეს არ მოგვეწონება, ვფიქრობ ერთად ვიბრძოლებთ იმისთვის, რომ აბსოლუტურად თავისუფალი იყოს ეს ტელევიზია. „რუსთავი 2“ როგორც ფაქტორი, განურჩევლად იმისა მოსწონს თუ არა ვინმეს, არის საქართველოს მონაპოვარი. ეს არ არის მხოლოდ „რუსთავი 2“-ის ჟურნალისტების მონაპოვარი, ეს არის ძალიან მაღალპროფესიული ტელევიზია, რომელსაც შესაძლოა ზოგ შემთხვევაში არ ეთანხმებოდე, ის არის საქართველოს სავიზიტო ბარათი და იგი იქნება შენარჩუნებული, აბსოლუტურად დარწმუნებული ვარ“, - განაცხადა ლევან ბერძენიშვილმა.

დღეს 14:00 საათზე საქართველოს პრემიერ-მინისტრი ევროსაბჭოს საპარლამენტო ასამბლეაზე სიტყვით გამოვიდა. დაახლოების 25 წუთიანი სიტყვა პრემიერმა საქართველოს ევროპულ მისწრაფებებზე, ხელისუფლების მიერ გატარებულ რეფორმებსა და ქვეყანაში შექმნილ ვითარებებზე საუბარს დაუთმო. კვირიკაშვილმა ასევე ისაუბრა რუსეთის მხრიდან ოკუპირებული ტერიტორიებისა და მცოცავი ანექსიის შესახებ.