საქართველოს პრემიერ-მინისტრის გამოსვლას ევროსაბჭოს საპარლამენტო ასამბლეაზე დეპუტატები აფასებენ. ლევან ბერძენიშვილის განცხადებით, გიორგი კვირიკაშვილი „იქცეოდა როგორც ნამდვილი ევროპელი“:

„გამოსვლის სტილი იყო ევროპული, აუღელვებელი და საქმიანი, რაც მთავარია ძალიან ინფორმაციული. კითხვებზე პასუხებს თავი არ აარიდა, ყველა კითხვას უპასუხა და მაქსიმალურად კორექტიული იყო, არცერთ მომენტში არ გაღიზიანდა, იქცეოდა როგორც ნამდვილი ევროპელი. სასიამოვნო საყურებელია, როდესაც შენი ქვეყნის პრემიერს აქვს საშუალება ამ სტილში გამოვიდეს“, - განაცხადა ლევან ბერძენიშვილმა.

დღეს 14:00 საათზე საქართველოს პრემიერ-მინისტრი ევროსაბჭოს საპარლამენტო ასამბლეაზე სიტყვით გამოვიდა. დაახლოების 25 წუთიანი სიტყვა პრემიერმა საქართველოს ევროპულ მისწრაფებებზე, ხელისუფლების მიერ გატარებულ რეფორმებსა და ქვეყანაში შექმნილ ვითარებებზე საუბარს დაუთმო. კვირიკაშვილმა ასევე ისაუბრა რუსეთის მხრიდან ოკუპირებული ტერიტორიებისა და მცოცავი ანექსიის შესახებ.