არასაპარლამენტო ოპოზიცია პარტიათა საკოორდინაციო საბჭოს ქმნის

პოლიტიკა - 16:21, 20 Apr, 2016

1962

არასაპარლამენტო ოპოზიციის წარმომადგენლებმა, რომელთა შორის საარჩევნო თემაზე მომუშავე ინტერპარტიული ჯგუფის წევრები არიან "ოპოზიციურ პარტიათა საკოორდინაციო საბჭო" შექმნეს.

განცხადება "პატრიოტთა ალიანსის" ლიდერმა ირმა ინაშვილმა პარტიის ოფისში რამდენიმე წუთის წინ გააკეთა.

მისი თქმით, საბჭოს მიზანია ხელი შეუწყოს სამართლიანი საარჩევნო გარემოს ჩამოყალიბებას.

"დღეს ჩვენ ჩამოვაყალიბეთ ოპოზიციურ პარტიათა საკოორდინაციო საბჭო, რომლის მთავარი მიზანია გავაერთიანოთ ჩვენი ძალები, ვიმოქმედოთ წინასაარჩევნო პროცესში, ისე არჩევნების დღეს. ჩვენ ერთობლივად ვიმოქმედებთ საპროტესტო აქციების დაგეგმვისა და განხორციელების კუთხით, გაუწევთ მონიტორინგს წინასაარჩევნო პროცესს, მოქმედებებს ევროპასა და აშშ-ში გადავიტანთ, სადაც ჩვენ ევროპელ და ამერიკელ პარტნიორებს მივაწვდით ინფორმაციას საარჩევნო გარემოსა და სისტემის შეცვლის აუცილებლობაზე"- აღნიშნა ინაშვილმა.

მისი თქმით, გაერთიანება აუცილებელი მას შემდეგ გახდა, რაც ხელისუფლებამ ინტერპარტიული ჯგუფის მნიშვნელოვანი მოთხოვნებიდან არც ერთი არ დააკმაყოფილა.

"საარჩევნო გარემოსა და სისტემის ცვლილებაზე ხელისუფლებასთან მოლაპარაკება მრავალი თვის განმავლობაში მიმდინარეობდა. გუშინ ეს კონსულტაციები კრახით დასრულდა. საქართველოს ხელისუფლებამ უარი თქვა არასაპარლამენტო ოპოზიციის კონკრეტულ მოთხოვნებზე, რითაც მან დაადასტურა რომ ახდენს საარჩევნო სივრცის სრულ უზურპაციას. ხაზგასმით მინდა ავღნიშნო, რომ ოპოზიციის არც ერთი მთავარი მოთხოვნა არ დაკმაყოფილდა. დღეს კიდევ ერთხელ შევიკრიბეთ და დღეს თქვენს წინაშე წარმოდგენილია ინტერპარტიული ჯგუფის თითქმის სრული შემადგენლობა"- თქვა ინაშვილმა.

"პატრიოტთა ალიანსის" ლიდერმა არც ის გამორიცხა, რომ საკოორდინაციო საბჭომ არჩევნებზე ერთობლივად მიიღოს მონაწილეობა.

"საარჩევნო ბლოკის შექმნაზე ვიმსჯელებთ. არ გამოვრიცხავთ, რომ გაერთიანებული ძალებით წარდგეს ოპოზიცია საპარლამენტო არჩევნებზე, თუმცა ამ ეტაპზე პრიორიტეტია საარჩევნო გარემოს ცვლილებისთვის ერთობლივი მუშაობა"- აღნიშნა ინაშვილმა.
"ოპოზიციურ პარტიათა საკოორდინაციო საბჭოში" ათი პოლიტკური პარტიაა გაწევრიანებული საბჭოს მდივანი ზურაბ ხარატიშვილია, საბჭოს სპიკერი კი ირმა ინაშვილია
საბჭოში შემავალი პარტიები არიან
"თავისუფალი საქართველო", "საქართველოს ევროპელი დემოკრატები", "სამოქალაქო ალიანსი თავისუფლებისათვის" " ქართველ ტრადიციონალისტთა კავშირი, "ქრისტიან- დემოკრატიული პარტია", " ეროვნულ- დემოკრატიული პარტია", " საქართველოს ძალოვან ვეტერანთა და პატრიოტთა პოლიტიკური მოძრაობა", "საქართველოს პატრიოტთა ალიანსი, " პოლიტიკური მოძრაობა "თავისუფლება", პოლიტიკური გაერთიანება " რეფორმატორები"