"მოგცემენ თუ არა მაპს?- არა... იქნებ პირდაპირ მიგვიღონ ნატოში- არა, მითუმეტეს არა."- შარაშენიძე

სოც.მედია - 14:48, 20 Apr, 2016

2117

ექსპერტი თორნიკე შარაშენიძე ვარშავის სამიტთან დაკავშირებულ მოლოდინებს სოციალურ ქსელში ეხმაურება. ექსპერტის თქმით აღნიშნულ სამიტზე საქართველოსთვის არც მაპ-ის მინიჭება არ მოხდება და მითუმეტეს არ მოხდება საქართველოს ნატოში მაპის გარეშე გაწევრიანება, რადგან ალიანსის წევრი რამდენიმე ქვეყანა ამის წინააღმდეგია და მათთან სათანადო მუშაობა არ მიდის:

„ნატოს სამიტი ახლოვდება და სულ უფრო და უფრო ხშირად დაისმება კითხვა მოგცემენ თუ არა მაპს.

ილუზია არ მაქვს რომ კიდევ ასჯერ არ მომიწევს ამ კითხვაზე პასუხის გაცემა, მაგრამ მაინც:

არ მოგვცემენ.

თუ ამის მიუხედავად მორიგ კითხვად მაინც დაისმება "და მაშინ იქნებ პირდაპირ მიგვიღონ ნატოში" (რასაც ახლა თურმე თავდაცვის მინისტრი აპირებს მოითხოვოს), პასუხია:

არა, მითუმეტეს არა.

და ეს იმიტომ რომ წინააღმდეგია რამდენიმე ქვეყანა და მათთან სათანადო მუშაობა არ მიდის. გარდა ამისა, ნატო გადართულია წევრი ქვეყნების დაცვაზე და ჩვენთვის ნაკლებად სცხელა (ყოველ შემთხვევაში უსაფრთხოების გარანტიას ვერ მოგცემს).

ოდესღაც ეს ვითარება შეიცვლება და ნატოს ჩვენთვის უფრო ეცლება, მაგრამ იქამდე მთავრობამ ბოლოსდაბოლოს უნდა დაიწყოს აქტიური მუშაობა იმ სახელმწიფოებთან ვინც ახლა გვბლოკავს.

თუ არადა ყოველი სამიტის წინ ისევ ცირკი გველის.“- წერს თორნიკე შარაშენიძე.