საქართველოს პრემიერ-მინისტრი 21 აპრილს ევროპის საბჭოს საპარლამენტო ასამბლეის სესიაზე სიტყვით გამოვა. გიორგი კვირიკაშვილი, საქართველოს დელეგაციასთან ერთად, სტრასბურგს 19-21 აპრილს ეწვევა.

ვიზიტის ფარგლებში, დაგეგმილია საქართველოს მთავრობის მეთაურის შეხვედრა ევროკომისიის პრეზიდენტ ჟან-კლოდ იუნკერთან. გიორგი კვირიკაშვილს ასევე ევროპის საბჭოს გენერალური მდივანი ტორბიორნ იაგლანდი უმასპინძლებს, რის შემდეგაც ერთობლივი პრესკონფერენცია გაიმართება.

ქართული დელეგაციის წევრები იმ შეხვედრებზე საუბრობენ, რაზეც საქართველოს მთავრობის მეთაური სესიაზე სიტყვით გამოსვლისას ყურადღებას გაამახვილებს. კვირიკაშვილი დეპუტატების შეკითხვებსაც უპასუხებს.

„მისი გზავნილები იქნება სწორედ ის რეფორმები, რომლებიც საქართველომ ბოლო წლების განმავლობაში გაატარა, პირველ რიგში ადმიანის უფლებების კუთხით, რაც საყურადღებოა ევროპის საბჭოსთვის. ის რეფორმები, რომლებიც წარმატებულად მიიჩნევა ჩვენი ევროპელი კოლეგების მხრიდან, ეს იქნება სასამართლო რეფორმა, სამართალდამცავი სისტემები, საარჩევნო პროცესი და ასე შემდეგ, ასევე პოლიტიკური პროცესი, რომელიც ძალიან მნიშვნელოვნად შეიცვალა ქვეყანაში. ის ხედვა, რომელიც აქვს მთავრობას და პრემიერ-მინისტრს“, - განაცხადა ეკა ბესელიამ.