მმართველი გუნდი მაჟორიტარული სისტემის გაუქმების მოთხოვნას ოპოზიციის სპეკულაციად აფასებს

პოლიტიკა - 17:01, 18 Apr, 2016

1300

საპარლამენტო უმრავლესობის წევრების განცხადებით, ოპოზიცია, საარჩევნო საკითხებით სპეკულაციას ეწევა. როგორც მმართველი გუნდის წარმომადგენლები აცხადებენ, ოპოზიციურმა პარტიებმა წინასწარვე იცოდნენ, რომ ხელისუფლება მაჟორიტარული სისტემის გაუქმებას არ აპირებდა, თუმცა ამ საკითხის გააქტიურებით ცდილობენ, საზოგადოება ხელისუფლების წინააღმდეგ განაწყონ:

"მეჩვენება, რომ პოლიტიკურ ოპონენტებს არ ყოფნით გამბედაობა, კარგ ცვლილებებს თავის სახელი დაარქვან და მიუხედავად იმისა, რა იქნება შეთავაზებული უმრავლესობის მხრიდან, მეჩვენება, რომ ოპოზიცია უბრალოდ ცდილობს, თითქოსდა სხვადასხვა მოდელებით საზოგადოებაში ასეთი აზრი ჩამოაყალიბოს, რომ ხელისუფლება არ თანხმდება ოპოზიციის მიერ შემოთავაზებულ წინადადებას. რეალურად გვაქვს საქმე პოლიტიკურ სპეკულირებასთან“, - განაცხადა საქართველოს პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა.

იგივე აზრს იზიარებს პარლამენტის გარემოს დაცვისა და ბუნებრივი რესურსების კომიტეტის თავმჯდომარეც. გია ჟორჟოლიანის თქმით, ინტერპარტიულმა ჯგუფმა კარგად იცოდა მათი პოზიცია პროპორციული სისტემის შესახებ.

"ჩვენ მივიღეთ ისტორიული გადაწყვეტილება, გავათანაბრეთ ყველა ამომრჩევლის ხმა და დღეიდან რაც არასდროს ყოფილა საქართველოში, საქართველოს ყველა მოქალაქე თანასწორი იქნება გადაწყვეტილების მიღებისას. ახლავე პროპორციულ სისტემაზე გადასვლას რაც შეეხება, ამაზე ჩვენი პოზიცია მყარია და ეს იცოდა კარგად ინტერპარტიულმა ჯგუფმა“, - განაცხადა ჟორჟოლიანმა.