რუსეთზე გადაცემული საიდუმლო მასალა - ლევან გვაზავა ხელისუფლებას ფაქტობრივად ღალატში ადანაშაულებს

პოლიტიკა - 21:55, 17 Apr, 2016

5213

საქართველოში რუსული სპეცსამსახურების აქტიურ მუშაობაზე საუბრობს პოლიციის გენერალ-მაიორი ლევან გვაზავა. ის ხელისუფლებას ფაქტობრივად ქვეყნის ღალატში ადანაშაულებს.

გვაზავა პოსტსკრიპტუმთან ბოლო სკანდალურ შემთხვევაზე საუბრობს. იგი ამბობს, რომ სახელმწიფო უშიშროების სამსახურის მონაცემთა საიდუმლო ბაზიდან, ქვეყნის სპეცსამსახურების არქივებში დაცული მასალები კონტრდაზვერვის ერთ-ერთმა თანამშრომელმა უკანონოდ მოიპოვა, დააკოპირა და ის რუს ოკუპანტებს გადასცა.

,,ეს თანამშრომელი მუშაობდა კონტრდაზვერვაში, რომელმაც მოიპარა მასალები ფლეშკით, ეს იყო დიდი მოცულობის, ძალიან სერიოზული მასალა. საფუძვლიანი ინფორმაცია, ყველანაირი სტრატეგიული ხასიათის. აქ საუბარია არა მარტო ქვეყნის უსაფრთხობეაზე, არამედ სხვადასხვა სფეროზე. საიდუმლო სერვერბზე წვდომა ძალიან შეზღუდულია. მე ვიყავი შს მინსიტრის მოადგილე და მე არ მქონდა წვდომა ამ სახის საიდუმლო მასალაზე. ამიტომ მოვუწოდე პრეზიდენტს და პრემიერს, რომ დაინტერსდეს. ვიღაცის შავი ხელი აშანტაჟებს ჩვენს მოქალაქეებს. ეს ყველაფერი მიდის რუსეთისკენ“ - აცხადებს ლევან გვაზავა.

დეპუტატ გივი თარგამაძის ინფორმაციით სუს-ის თანამშრომელსა და რუსული სპეცსამსახურების წარმომადგენლებს შორის შეხვედრა საქართველოს ოკუპირებულ ტერიტორიაზე მოხდა, სადაც გაქცეული ჩინოვნიკი ახალგორის გავლით გადავიდა.

სუს-ის ანალიტიკური სამსახურის თანამშრომელი, ვინც ოპოზიციის ინფორმაციით საიდუმლო სერვერებზე დაცული მასალები გაიტანა, გია არდაზიშვილია. დაკავებულის დედას ამ თემაზე არ საუბრობს, თუმცა ნათესავები ყვებიან, რომ დაკავება არდაზიშვილის სამსახურეობრივ საქმიანობას უკავშირდება.

არდაზიშვილის დაკავებას ადასტურებს უსაფრთხოების სამსახურის ადმინისტრაციის უფროსის მოადგილეც, თუმცა ამბობს, რომ ბრალდებულს საიდუმლო მასალებთან წვდომა არ ჰქონია.

პროკურატურაში პოსტსკრიპტუმს მხოლოდ ის უთხრეს, რომ არდაზიშვილი საქმე უკვე სასამართლოშია, სადაც მის წინააღმდეგ მოწმეების დაკითხვა მიმდინარეობს.