იან კელის მისამართით გამოთქმული მუქარის გამო მოქალაქის დაკავებას აშშ-ის საელჩო გამოეხმაურა

პოლიტიკა - 18:03, 15 Apr, 2016

1101

ამერიკის ელჩის მისამართით ინტერნეტფორუმზე გამოქვეყნებული მუქარის გამო. მოქალაქოს მიმართ გამოტანილ სასამართლო განაჩენს საქართველოში აშშ-ის დიპლომატიური წარმომადგენლობა განცხადებით ეხმაურება:

„აშშ-ის საელჩო აფასებს, თუ როგორი სერიოზულობით მოეკიდა საქართველოს ხელისუფლება - მათ შორის მთავარი პროკურორის ოფისი, სახელმწიფო დაცვის სპეციალური სამსახური, საქართველოს სახელმწიფო უშიშროების სამსახური და შინაგან საქმეთა სამინისტრო - ელჩ კელის წინააღმდეგ მიმართულ მუქარას.

საერთაშორისო შეთანხმებებით დაცული პირის წინააღმდეგ მუქარის საქმეზე მიმდინარეობს გამოძიება. ამიტომ აშშ-ის საელჩოს დამატებითი კომენტარის გაკეთება არ შეუძლია.“- აღნიშნულია განცხადებაში.

შეგახსენებთ, „თბილისის ფორუმის“ ერთ-ერთმა მომხმარებელმა, საქართველოს მოქალაქემ ინტერნეტფორუმზე პოსტი გამოაქვეყნა, სადაც დაწერა, რომ გეგმავდა აშშ-ის ელჩის და საელჩოს წინააღმდეგ ტერაქტს. აღნიშნულის გამო მოქალაქე დააკავეს და მას სასამართლომ წინასწარი პატიმრობა შეუფარდა. მოქალაქის ოჯახის წევრების განმარტებით, აღნიშნული განცხადება მხოლოდ ხუმრობა იყო.