ოჯახური საიდუმლოს ხელყოფის ფაქტებზე პასუხისმგებლობის გამკაცრებას პარლამენტმა მხარი დაუჭირა

პოლიტიკა - 17:13, 15 Apr, 2016

1139

საქართველოს პარლამენტმა სისხლის სამართლის კოდექსში დაგეგმილი ცვლილებები 87 ხმით 4-ის წინააღმდეგ პირველი მოსმენით დაამტკიცა , კანონპროექტი პირადი და ოჯახური საიდუმლოს ხელყოფის ფაქტზე სისხლის სამართლის პასუხისმგებლობის გამკაცრებას ითვალისწინებს. ინიციატივა პარლამენტის ადამიანის უფლებათა დაცვის კომიტეტს ეკუთვნის.

”სისხლის სამართლის კოდექსში” დაგეგმილი ცვლილებებით კოდექსის 157-ე მუხლიდან პირადი ან ოჯახური საიდუმლოს ხელყოფის გამიჯვნა ხდება.

პროექტის მიხედვით, კოდექსს ახალი მუხლი ემატება, რომლის თანახმად, პირადი ან ოჯახური საიდუმლოს უკანონოდ მოპოვება, შენახვა, გამოყენება, გავრცელება ან ხელისწვდომობის სხვაგვარად უზრუნველყოფა დაისჯება თავისუფლების აღკვეთით ვადით 4-დან 7 წლამდე.

პირადი ან ოჯახური საიდუმლოს უკანონოდ გამოყენება და გავრცელება ამა თუ იმ ხერხით გავრცელებული ნაწარმოების, ინტერნეტის, მათ შორის სოციალური ქსელის, მასობრივი მაუწყებლობის ან სხვა საჯარო გამოსვლის მეშვეობით, იქნება დასჯადი თავისუფლების აღკვეთით ვადით 5-დან 8 წლამდე. აღნიშნული ქმედება ჩადენილი ანგარებით, არაერთგზის გამოიწვევს სისხლის სამართლის პასუხისმგებლობას – თავისუფლების აღკვეთით 6-დან 9 წლამდე.

ამასთან, პროექტის მიხედვით, ზემოთ აღნიშნული ქმედება, ჩადენილი იმ პირის მიერ, რომელსაც სამსახურებრივი მდგომარეობის, პროფესიული საქმიანობის ან სხვა გარემოების გამო ამ საიდუმლოს დაცვა ევალდებოდა ან რომელმაც აღნიშნული ქმდება სამსახურებრივი მდგომარეობის გამოყენებით ჩაიდინა – დაისჯება თავისუფლების აღკვეთით 7-დან 10 წლამდე ვადით.