"ასეთ უძლურებაში მყოფ ხალხს, რატომ გქვიათ ხელისუფლება?"- ხერხეულიძე მმართველ გუნდს აკრიტიკებს

პოლიტიკა - 15:18, 15 Apr, 2016

1468

”სისხლის სამართლის კოდექსში” დაგეგმილი ცვლილებების პროექტი, რომელიც პირადი და ოჯახური საიდუმლოს ხელყოფის ფაქტზე პასუხისმგებლობის გამკაცრებას ითვალისწინებს პარლამენტში მწვავე განხილვის თემა გახდა. ოპოზიციის მოსაზრებით ხელისუფლების მიერ დაგეგმილი ცვლილებები მოჩვენებითია და პრობლემის რეალურად მოგვარების სურვილი და შესაძლებლობა ხელისუფლებას არ აქვს. ენმ-ს წევრმა ეკა ხერხეულიძემ მმართველ გუნდს თვალთვალის და შანტაჟის ის ფაქტები შეახსენა, რომელიც 2012 წლის ოქტომბრის შემდეგ განხორციელდა:

„მაინტერესებს ვინ დაისაჯა , როდესაც მოსამართლის თანაშემწეს აშანტაჟებდნენ და ავალებდნენ რომ მოსასმენი აპარატურა დაემონტაჟებინა მოსამართლის ოთახში? ვინ დაისაჯა, როდესაც ნიკა გვარამიას აშანტაჟებდა ხელისუფლება და ეუბნებოდა, რომ თუ არ დანებდებოდა და არ ჩააბარებდა რუსთავი2-ს, მას პირადი ცხოვრების ამსახველ ვიდეოს გამოუქვეყნებდნენ. ვინ აშანტაჟებდა ჟურნალისტ ეკა მიშველაძეს? ფარესაშვილზე დღემდე ხმა არ ისმის. თუ ჩემს მიერ ჩამოთვლილი ეს 4 ფაქტიც არის წინა ხელისუფლების მიერ დაკვეთილი , მაშინ თქვენ ასეთ უძლურებაში მყოფ ხალხს, რატომ გქვიათ ხელისუფლება? თუ ეს ასე არ არის მაშინ მაინტერესებს ადამიანები, რომლებიც ვერ ადგენთ ამ ფარული ჩანაწერების წარმომავლობას, თქვენი მმართველობის პერიოდში, მაშინ როგორ უნდა გაიგოთ მტრულად განწყობილი სახელმწიფოს თავდასხმა ჩვენს ქვეყანაზე.“- განაცხადა ეკა ხერხეულიძემ პლენარულ სხდომაზე გამოსვლისას.