საპარლამენტო არჩევნების თარიღის ცვლილებას საქართველოს პარლამენტის დეპუტატები არ გამორიცხავენ, კოალიცია „ქართული ოცნების“ წევრების აზრით, არჩევნების თარიღზე პრეზიდენტი და პრემიერ-მინისტრი უნდა შეთანხმდნენ.

„ოქტომბერში რომ ჩატარდებოდა არჩევნები, ეს კანონით არის განსაზღვრული, მაგრამ რიცხვი უნდა განსაზღვროს პრეზიდენტმა. ამის განსაზღვრა ასეთ პრობლემას იწვევდეს, ნამდვილად არასერიოზულად მიმაჩნია“, - აცხადებს ზურაბ ტყემალაძე.

„ნაციონალური მოძრაობის“ წევრები ფიქრობენ, რომ ხელისუფლება ცდილობს ოპოზიციას სრულფასოვანი წინასაარჩევნო კამპანიის ჩატარების საშუალება არ მისცეს.

„ხელმოწერის დაყოვნებით მთავრობა ცდილობს შეუზღუდონ ოპოზიციას სრულფასოვანი კამპანიის წარმოების საშუალება და ამ გზით ჩაებღაუჭონ ძალაუფლებას. რანაირი პროცედურული ხრიკებიც არ უნდა გამოიყენოს მთავრობამ, განწირულია იმისათვის, რომ მას ხალხმა ნდობა არ გამოუცხადოს“, - აღნიშნავს გიორგი კანდელაკი.

პრეზიდენტის ნაჩქარევ გადაწყვეტილებაზე „რესპუბლიკელებიც“ საუბრობენ.

„მე არ მესმის რატომ უნდა გაუჩნდეს მთავრობას, პრემიერს სხვა მოტივაცია მაისის დასაწყისში, რომ პრეზიდენტის მიერ ასე სასწრაფოდ და ნაჩქარევად დაანონსებული, რომ მაისში დანიშნავს არჩევნებს, ამჟამად მისაღები აღმოჩნდეს პრემიერისთვის“, - განაცხადა დავით ბერძენიშვილმა.

მხარეებს კონსულტაციების დაწყებისკენ კი „თავისუფალი დემოკრატები“ მოუწოდებენ.

„რეალურ საფრთხეს არჩევნების თარიღის გადაწევასთან მიმართებით ვერ ვხედავ, მაგრამ არის ის, რომ ერთხელ და სამუდამოდ უნდა დავუსვათ ამ ინსტიტუციონალურ ბრძოლას წერტილი. უნდა მოხდეს მოლაპარაკება პრეზიდენტსა და პრემიერ-მინისტრს შორის. იმასთან დაკავშირებით თუ როდის გამოცხადდება და როდის შეწყდება ადმინისტრაციული რესურსების გამოყენების შესაძლებლობა“, - განაცხადა ვიქტორ დოლიძემ.