სასჯელაღსრულებისა და პრობაციის სამინისტროს თავისუფლების შეზღუდვის დაწესებულების ამოქმედება მნიშვნელოვან ნოვაციას წარმოადგენს და ეს დაწესებულება მსჯავრდებულთა საზოგადოებაში რეინტეგრაციის მხარდაჭერას ისახავს მიზნად, _ აღნიშნულია ევროპის საბჭოს ანგარიშში „ციხეების გადატვირთულობა აღმოსავლეთ პარტნიორობის ქვეყნებში“. დოკუმენტში ყურადღება გამახვილებულია იმ დადებით ტენდენციებზე, რომელიც საქართველოსთან მიმართებით გამოიკვეთა. პოზიტიური შედეგები სასჯელაღსრულებისა და პრობაციის სისტემაში განხორციელებული რეფორმისა და სწორი სტრატეგიული ხედვის შედეგია.

თავისუფლების შეზღუდვის დაწესებულებაში, რომელიც 2014 წლის ივნისიდან ფუნქციონირებს, განთავსებულნი არიან მსჯავრდებულები, რომლებსაც

ადგილობრივი საბჭოს გადაწყვეტილების საფუძველზე თავისუფლების აღკვეთა თავისუფლების შეზღუდვით შეეცვალათ. 2017 წლის იანვრიდან თავისუფლების შეზღუდვის დაწესებულებაში, ასევე, განთავსდებიან პირები, ვისაც თავისუფლების შეზღუდვას სასამართლო შეუფარდებს.

დაწესებულების ძირითად მიზანს მსჯავრდებულის საზოგადოებაში რეინტეგრაცია, რეაბილიტაცია და გათავისუფლებისთვის მომზადება წარმოადგენს. თავისუფლების შეზღუდვის დაწესებულებაში მსჯავრდებულს შეუძლია დასაქმდეს და თანხა გამოიმუშავოს.

დაწესებულებაში განთავსებულ პირებს შეზღუდული არ აქვთ ერთმანეთთან ურთიერთობისა და ტერიტორიაზე გადაადგილების უფლება. ამასთან, ინდივიდუალური შეფასების საფუძველზე, მათ შესაძლებლობა აქვთ შაბათ-კვირას დატოვონ დაწესებულების ტერიტორია და ოჯახებში წავიდნენ.

2015 წლის იანვარში თავისუფლების შეზღუდვის დაწესებულებაში სოციალური საწარმო გაიხსნა. პროექტი პრობაციის ეროვნული სააგენტოსა და მიგრაციის საერთაშორისო ორგანიზაციის თანამშრომლობის ფარგლებში განხორციელდა. მოეწყო ხის გადამამუშავებელი საამქრო, სადაც 2 წლის განმავლობაში, 6 თვიანი შუალედით, სულ მცირე 25 ყოფილი ნარკომომხმარებელი პრობაციონერი, პოტენციური მიგრანტი და ემიგრანტი დასაქმდება.

დაწესებულების ტერიტორიაზე, ასევე, ფუნქციონირებს პურის საცხობი და მაკარონის საწარმო, სადაც თავისუფლებაშეზღუდული პირები არიან დასაქმებულნი. სამუშაოზე მათი შერჩევა წინასწარ შემუშავებული კრიტერიუმების მიხედვით განხორციელდა. ამ საწარმოებში დამზადებული პროდუქციის რეალიზება პენიტენციურ დაწესებულებებში ხდება. პურის საცხობ საწარმოში დღეში 10 ათასი პურის გამოცხობაა შესაძლებელი. მასში დასაქმებულია 8 მსაჯვრდებული, რომელთა ხელფასი დღეში 17,5 ლარია. მაკარონისა და ვერმიშელის საწარმოშიც, ასევე, 8 მსჯავრდებულია დასაქმებული და მათი ყოველდღიური ანაზღაურება 15,5 ლარს შეადგენს.

თავისუფლების შეზღუდვის დაწესებულებაში განთავსებულ პირს სრული შესაძლებლობა აქვს გაიაროს პროფესიული გადამზადება, აითვისოს ახალი პროფესია და საზოგადოებაში დაბრუნების შემდეგ, შრომის ბაზარზე კონკურენტუნარიანი იყოს.

ევროპის საბჭომ მიმდინარე წლის 13 აპრილს გამოაქვეყნა ანგარიში - „ციხეების გადატვირთულობა აღმოსავლეთ პარტნიორობის ქვეყნებში“, რომელიც ევროკავშირისა და ევროსაბჭოს თანამშრომლობის პროგრამის ფარგლებში მომზადდა. დოკუმენტში გაანალიზებულია სისხლის სამართლის სფეროში აღმოსავლეთ პარტნიორობის ქვეყნების, კერძოდ, საქართველოს, უკრაინის, მოლდოვისა და სომხეთის კანონმდებლობა და პრაქტიკა.