"10 ოჯახიდან ადრე 7 გვიჭერდა მხარს, ახლა 4-ია ჩვენი"-ნესტორ რამიშვილი კვაჭანტირაძეს არ ეთანხმება და NDI-ის ენდობა

პოლიტიკა - 12:21, 14 Apr, 2016

2684

ოზურგეთის მაჟორიტარი დეპუტატის შეფასებას, NDI-ის მიერ ჩატარებულ ბოლო კვლევასთან დაკავშირებით, გურიის გუბერნატორის აპარატის მთავარი სპეციალისტი, ნესტორ რამიშვილი გამოეხმაურა, თუმცა კვაჭანტირაძისგან განსხვავებით, ის კონკრეტული მაგალითით შეეცადა რეალობისთვის თვალის გასწორებას: "სამწუხაროდ ქალაქის ერთი უბანი მე თვითონ გადავამოწმე და ათი ოჯახიდან ოთხი იყო ჩვენი".

რა იგულისხმა ბატონმა რამიშვილმა აღნიშნულ კომენტარში და იყო თუ არა ეს მისი მხრიდან ერთგვარი მინიშნება მაჟორიტარისთვის, რომ აღნიშნული კვლევა მაინც და მაინც არ ტყუა, "გურიის მოამბე" ნესტორ რამიშვილს დაუკავშირდა:

ჩვენს კითხვაზე, ენდობა თუ არა ის მოცემულ კვლევებს, პასუხად მივიღეთ, რომ ფაქტი სახეზეა: "ვენდობი თუ არ ვენდობი, ფაქტი არის სახეზე. 10 ოჯახიდან, ჩვენი მხარდამჭერი არის 4".

_ ანუ, ეს ნიშნავს, რომ "ოცნებამ" რეალურად დაკარგა რეიტინგი ?

_ ადრე, 10-დან 7 ჩვენი იყო, ახლა შემცირდა. სამწუხაროდ ასეა.

_ დანარჩენები ვისი მხარდამჭერები არიან?

_ ზოგი იმ პარტიის, ზოგი ამის. "ნაციონალების" არა ყოველ შემთხვევაში.

_ თქვენ როგორ ფიქრობთ, რატომ იკლო თქვენი მხარდამჭერების რიცხვა?

_ ხალხი უკმაყოფილოა, რომ ყველგან მაინც "ნაციონალების" კადრები არიან სამსახურებში. ეს აღიზიანებთ მათ. "ოცნებამ" ვერ შეძლო მათი მომხრეების დასაქმება. კოჰაბიტაციამ შექმნა ეს პრობლემები.

_ კოაბიტაციამ შეგიქმნათ პრობლემები?

_ დიახ. ეს არავის არ მოსწონს.

_ კონკრეტულად, ვის გულისხმობთ, რომელ სამსახურებს?

_ გაიხედეთ, ყველგან ასეა. ყველა სამსახურის ხელმძღვანლად დანიშნულია ყოფილი "ნაციონალი" ფაქტიურად. მაღალ თანამდებობებზეც ასეა.

_ ვისზე საუბრობთ, ქალაქის მერი და გამგებელი არჩეულია თქვენი მხარადამჭერების მიერ, მათ მოადგილეებს გულისხმობთ თუ გუბერნატორს? დანიშნულები რახან ახსენეთ.

_ არა, გუბერნატორი 100%-ი ჩვენია, "ქართული ოცნების". ოზურგეთში ყველამ იცის ვინ არის ნაციოანლი და ვინ არა. ასეთი მიდგომის ბრალია ყველაფერი.

_ ფაქტიურად ამბობთ, რომ "ნაციონალურმა მოძრაობამ" შეიწირა "ოცნების" რეიტინგი?

_ ნამდვილად ასეა.

_ 2016 წლის არჩევნებზე რისი იმედი გაქვთ?

_ მაგას მოვიგებთ, არ არის მაგაზე ლაპარაკი.

თეა იოსელიანი - გურია