პერსონალურ მონაცემთა დაცვის ინსპექტორმა ევროპელ ექსპერტებთან ერთად საკანონმდებლო ცვლილებების პროექტი წარადგინა

პოლიტიკა - 11:55, 14 Apr, 2016

1076

14 აპრილს, პერსონალურ მონაცემთა დაცვის ინსპექტორმა თამარ ქალდანმა ინსპექტორის აპარატის მიერ მომზადებული საკანონმდებლო ცვლილებების პროექტი საჯარო, არასამთავრობო და საერთაშორისო ორგანიზაციების წარმომადგენლებს გააცნო.

პროექტი ითვალისწინებს „პერსონალურ მონაცემთა დაცვის შესახებ“ კანონში რამდენიმე პრინციპულ ცვლილებას, რომელთა მიზანია არსებული კანონმდებლობის დახვეწა, მისი ევროპულ სტანდარტებთან ჰარმონიზაცია, პრაქტიკაში გამოვლენილი ხარვეზების აღმოფხვრა და ინსპექტორის აპარატის მუშაობის ეფექტურობის გაზრდა. კანონპროექტის მიხედვით, ცვლილებები ასევე უნდა განხორციელდეს 8 სხვა კანონში.

შეხვედრას ესწრებოდნენ საჯარო, არასამთავრობო და საერთაშორისო ორგანიზაციების წარმომადგენლები, საქართველოში ევროპის საბჭოს ოფისის ხელმძღვანელი კრისტიან ურსე.

ინსპექტორის აპარატის მიერ მომზადებული საკანონმდებლო წინადადების შესაბამისობა ევროპულ სტანდარტებთან ევროპის საბჭოს ექსპერტთა გუნდმა შეაფასა. შეხვედრაზე ექსპერტებმა წარმოადგინეს მოსაზრებები, რომელთა გათვალისწინებაც საბოლოო პროექტში მოხდება.

შემოთავაზებული ცვლილებებით ფართოვდება კანონის მოქმედების სფერო, აუდიოკონტროლი ექცევა სპეციალური რეგულაციის ქვეშ, მკაცრდება სანქციები ისეთი დარღვევების მიმართ, რომელიც შეეხება დიდი ოდენობით მონაცემთა უკანონო დამუშავებას.

ცვლილებების მიხედვით, ინსპექტორს ენიჭება უფლებამოსილება მოითხოვოს კონტროლის ელექტრონული სისტემისა და ფარული საგამოძიებო მოქმედებების განხორციელების ორ-ეტაპიანი ელექტრონული სისტემის ინფორმაციული უსაფრთხოების აუდიტი.

კანონპროექტი ასევე, ითვალისწინებს მონაცემთა დამმუშავებლების თეთრი და შავი სიის შექმნას, სადაც აისახება ინფორმაცია იმ ორგანიზაციების შესახებ, რომლებიც პერსონალური მონაცემების დაცვის კანონმდებლობის შესრულების მაღალი სტანდარტით გამოირჩევიან ან სისტემატიურად და უხეშად არღვევენ მას.

მოქალაქეთა უფლებების დაცვისა და ინსპექტორის საქმიანობის ეფექტურობის გაზრდის მიზნით, პროექტი ითვალისწინებს მოქალაქეთა განცხადების განხილვისა და ინსპექტირების განხორციელების მარეგულირებელი ნორმების ცვლილებებს, დაიხვეწება საქმის წარმოების ვადები და შემოწმების განხორციელების პროცედურები.

„პერსონალურ მონაცემთა დაცვის ევროპული სტანდარტების დასამკვიდრებლად მნიშვნელოვანია გაგრძელდეს რეფორმები, ჩვენი მიერ მომზადებული საკანონმდებლო ცვლილებები შეაფასეს ევროპელმა ექსპერტებმა და აღნიშნულ წინადადებებს ექსპერტების დასკვნასთან ერთად წარვუდგენთ საქართველოს პარლამენტს“ - აღნიშნა ინსპექტორმა.

ღონისძიება განხორციელდა „ევროპის კავშირის და ევროპის საბჭოს ერთობლივი პროექტი მონაცემთა დაცვის უფლების გაძლიერების“ მხარდაჭერით.