"არა ოკუპაციას! არა რასიზმს! დაიცავი დედა ენა!"- "აფხაზთა კრება" დღეს აქციას გამართავს

პოლიტიკა - 10:15, 14 Apr, 2016

2003

დღეს, 14 აპრილს 13.00 საათზე დედაენის ბაღში აფხაზთა კრების ორგანიზაციები გალელი თანამემამულეებისადმი სოლიდარობის აქციას გამართავენ და იმ თანამემამულეებს, რომელთაც საოკუპაციო რეჟიმმა მშობლიურ ენაზე სწავლება აუკრძალა თანადგომას გამოუცხადებენ:

"1978 წელს ქართველმა ერმა მშობლიური ენის დასაცავად უდიდესი სიმტკიცე, ერთსულოვნება და თავგანწირვისათვის მზადყოფნა გამოავლინა. თბილისში გამართული მძლავრი მანიფესტაციის გამო მრისხანე კომუნისტურმა იმპერიამ უკან დაიხია და ქართული ენის სახელმწიფოებრივი სტატუსი შენარჩუნებულ იქნა.

დღეს ოკუპირებულ აფხაზეთში გაცილებით უარესი ვითარებაა. მტერმა მიმდინარე სასწავლო წლიდან გალის რაიონში მთლიანად აიკრძალა ქართულად სწავლება. რუსულმა ადმინისტრაციამ უმძიმესი რასობრივი ჩაგვრის ქვეშ მყოფ 35 ათას ჩვენს თანამემამულეს საბოლოოდ მოუსპო საკუთარ ენაზე ურთიერთობისა და სწავლის უფლება. სამუშაოდან საგანგებოდ ათავისუფლებენ ქართულის მასწავლებელებს იმიტომ, რომ სკოლებში არალეგალურადაც არ მოხდეს ქართულად სწავლება. რუსიფიცირებულია საბავშვო ბაღებიც.

საერთაშორისო სამართლის პრინციპებით, ოკუპაციის პირობებშიც კი სავალდებულოა ადამიანის ფუნდამენტური უფლებების დაცვა, მათ შორის მშობლიურ ენაზე განათლების უფლებისა იმ სახელმძღვანელოებით, რომლის შინაარსსაც ოკუპანტი სახელმწიფო ან ადგილობრივი მარიონეტული რეჟიმი შეიძლება არ ეთანხმებოდეს.

გალელთა დევნა-შევიწროების აღმაშფოთებელ ფაქტებზე ჩვენი ხელისუფლება დუმს, რაც კიდევ უფრო აქეზებს რუს ოკუპანტს, ამძიმებს ოკუპირებულ ტერიტორიებზე მცხოვრები ქართველების მდგომარეობას.

ჩვენი თანამოძმეები იმედით შემოგვყურებენ ენგურს გაღმიდან. მათი თანადგომა ყველა ჩვენთაგანის ვალია.

დღეს, 14 აპრილს 13.00 საათზე დედაენის ბაღში აფხაზთა კრების ორგანიზაციები ვატარებთ ჩვენი გალელი თანამემამულეებისადმი სოლიდარობის აქციას.

არა ოკუპაციას! არა რასიზმს! დაიცავი დედა ენა!"- აღნიშნულია "აფხაზთა კრების" მიმართვაში.