საარჩევნო თემებზე მომუშავე ინტერპარტიული ჯგუფი არასამთავრობო ორგანიზაციებს ხვალ შეხვდება

პოლიტიკა - 23:12, 11 Apr, 2016

1365

ხვალ, 11:00 საათზე საარჩევნო თემებზე მომუშავე ინტერპარტიული ჯგუფი არასამთავრობო ორგანიზაციებს შეხვდება.

როგორც "ნიუპოსტს" პოლიტიკური გაერთიანება „სამოქალაქო ალიანსი თავისუფლებისათვის“ ლიდერმა ზურაბ ხარატიშვილმა განუცხადა, შეხვედრაზე იმ საკანონმდებლო ცვლილებების შინაარსს განიხილავენ, რომლითაც ინტერპარტიული ჯგუფი მაჟორიტარული წესით არჩევნების გაუქმებას ითხოვს.

შეგახსენებთ, რომ საკანონმდებლო ცვლილებების ინიციატორებისათვის საარჩევნო კოდექსში ცვლილებების შეტანის 2020 წლისათვის გადადება მიუღებელია. ინტერპარტიულ ჯგუფში აცხადებენ, რომ ხელისუფლების მიერ დასახელებული არგუმენტები არადამაჯერებელია, ისინი ხელისუფლებისგან პასუხს 15 აპრილამდე ელოდებიან.

"ხვალინდელი შეხვედრის მიზანია გარკვეული კონსულტაციები ვაწარმოოთ საარჩევნო გარემოს გაუმჯობესების თვალსაზრისით არასამთავრობო სექტორთან. მათ მივაწვდით ინფორმაციას, იმის შესახებ თუ რა ეტაპზეა საარჩევნო გარემოს გაუმჯობესების მიზნით ხელისუფლებასთან დაწყებული მოლაპარაკება. პრინციპში აქ ბევრი არაფერია სათქმელი, რადგან ხელისუფლება ამ მოლაპარაკების წარმატებით დასრულებისთვის არაფერს არ აკეთებს. მოვლენების შემდგომი განვითარების შესახებაც მოვახდენთ არასამთავრობო ორგანიზაციების ინფორმირებას" - აღნიშნა ხარატიშვილმა.

მისი თქმით, ხელისუფლების პასიურობა ოპტიმიზმის საფუძველს არ იძლევა.

"15 აპრილის შემდეგ, თუ ხელისუფლება არ წამოვა დათმობაზე, ჩვენ ფართო კოორდინაციის რეჟიმზე გადავალთ, რომ ოპოზიციურმა პარტიებმა ერთობლივი ძალებით მოვახერხოთ ხელისუფლებაზე ზეწოლა, რომ საარჩევნო სისტემა შეიცვალოს. ჩვენ არ მივცემთ ხელისუფლებას რომ ხმები მიითვისოს, ხმების დათვლა თუ გახდა საჭირო ამას გავაკეთებთ"- განმარტა ხარატიშვილმა.

შეხვერა "რედისონში" გაიმართება.