თამაზ მეჭიაური მზად არის უარი თქვას ნატოზე. „ქართული ოცნების“ დეპუტატმა დღეს ამ თემაზე საქართველოს ტერიტორიული მთლიანობის კონტექსტში ისაუბრა. მეჭიაური მიიჩნევს, რომ ნატო-ში წევრობა თუ რაიმე საფრთხეს ქმნის, მაშინ ქვეყანამ უარი უნდა თქვას ალიანსში წევრობაზე.

„თუ ამ ქვეყანისთვის დამაზიანებელი იქნება რომელიმე პოლიტიკური და სამხედრო ბლოკი, მასთან ძალიან მჭიდრო ურთიერთობა, ეს საფრთხეს თუ შეუქმნის ჩემი ქვეყნის უსაფრთხოებას და ტერიტორიულ მთლიანობას, მე უარს ვიტყვი ნებისმიერ რამეზე, ვინც არ უნდა იყოს და რაც არ უნდა იყოს. მე ამას ვამბობ, თვითონ გვეუბნებიან ვერ მიგიღებთ ჯერო, რა აურზაური ავტეხეთ, მე თუ საომარ სიტუაციაში მოვყევი, რატომ არ უნდა ვთქვა უარი? როგორც კი საქართველო გახდება მხარე, შეიძლება დაინგრეს საერთოდ, მერე ვეღარც ნატო გვიშველის და ვეღარც რუსეთი“, - განაცხადა თამაზ მეჭიაურმა.