საქართველოს თავდაცვის მინისტრი რუმინეთში ოფიციალურ ვიზიტს განაგრძობს. რუმინელ კოლეგასთან შეხვედრის შემდეგ თინათინ ხიდაშელი კონტროჩენის სასახლეში გაემგზავრა. საქართველოს თავდაცვის უწყების ხელმძღვანელს რუმინეთის პრეზიდენტის მრჩეველმა ეროვნული უსაფრთხოების საკითხებში იონ ოპრიშორმა უმასპინძლა. შეხვედრის ძირითადი თემა საქართველოს ნატოში ინტეგრაცია იყო. მხარეებმა ასევე ისაუბრეს უსაფრთხოებისა და თავდაცვის საკითხებში ურთიერთთანამშრომლობასა და ნატოს ვარშავის სამიტთან დაკავშირებულ მოლოდინებზე.

„შეხვედრა გაიმართა პრეზიდენტის ადმინისტრაციაში, კერძოდ, უშიშროების საბჭოში. საქართველოს მსგავსად რუმინეთში და ბევრ ქვეყანაში, პრაქტიკულად, ყველგან პრეზიდენტი არის მთავარსარდალი და, შესაბამისად, უსაფრთხოებისა და თავდაცვის საკითხებზე ერთ-ერთი მთავარი სტრუქტურა და ორგანო არის, სწორედ, უშიშროების საბჭო. ვარშავის სამიტზე, სწორედ, ისინი იქნებიან რუმინეთის წარმომადგენლები, ამიტომ, ბუნებრივია მნიშვნელოვანი იყო, გაგვეცვალა ინფორმაცია, გზავნილები, გვესაუბრა სტრატეგიებსა და ტაქტიკაზე, რომლითაც ვფიქრობთ, რომ მივიდეთ სამიტზე“,- განაცხადა თინათინ ხიდაშელმა.