საპარლამენტო არჩევნების თარიღის გამოცხადებასთან დაკავშირებით, საპარლამენტო უმცირესობის რიგებში კომენტარი კეთდება. „ერთიანი ნაციონალური მოძრაობის“ წევრი, აკო მინაშვილი აცხადებს, რომ პრეზიდენტმა შეცდომა დაუშვა, რადგან მას პარტიებთან კონსულტაცია აღნიშნულ თემაზე არ გაუვლია.

„ერთადერთი, რაც ხელთ აქვთ, ეს არის ადმინისტრაციული რესურსის გამოყენება და ეს არის არადემოკრატიული გზებით ძალაუფლების შენარჩუნება. ამის ძალიან ბევრი მაგალითი ვნახეთ. ძალიან დიდი შეცდომა, რაც პრეზიდენტ მარგველაშვილს მოუვიდა, არის ის, რომ მან ყოველგვარი კონსულტაციის გარეშე, მოულოდნელად გამოაცხადა საარჩევნო თარიღი, მას არ ჰქონდა კონსულტაციები პარტიებთან და ეს თარიღი გამოცხადდა პრემიერ-მინისტრისა და „ქართული ოცნების“ წარმომადგენლებთან თათბირის შემდეგ“, - აცხადებს აკო მინაშვილი.

არჩევნების თარიღის შესახებ ცნობილი გუშინ გახდა. გიორგი მარგველაშვილის განცხადებით, 2016 წლის საპარლამენტო არჩევნები 8 ოქტომბერს ჩაინიშნა.