საქართველოს პრეზიდენტის ინიციატივით მიმდინარე პროექტის „ინტერნეტი ყველა სოფლის ბიბლიოთეკას“ მეორე ეტაპის პრეზენტაცია დღეს პრეზიდენტის სასახლეში გაიმართა.

პროექტი მიზნად ისახავს საქართველოს მასშტაბით სოფლის ბიბლიოთეკების ინტერნეტითა და კომპიუტერული ტექნიკით აღჭურვას. პროექტის მეორე ეტაპზე ბიბლიოთეკარების გადამზადება და ტრენინგებიც იგეგმება.

ღონისძიებას საქართველოს პრეზიდენტის ადმინისტრაციის უფროსი გიორგი აბაშიშვილი დაესწრო და მოწვეულ სტუმრებს, რომელთა შორის საქართველოს სხვადასხვა რეგიონებიდან ჩამოსული ბიბლიოთეკარები იყვნენ, სიტყვით მიმართა.

„ პირველ რიგში მინდა საქართველოს პრეზიდენტის სახელით გადმოგცეთ მადლობა თანამშრომლობისათვის. მინდა ასევე მადლობა გადავუხადო საქართველოს საბიბლიოთეკო ასოციაციას, სწორედ მათთან თანამშრომლობით ჩვენ შევძელით შარშან 50-მდე ბიბლიოთეკის აღჭურვა შესაბამისი ტექნიკით, ინვენტარითა და ინტერნეტით. განსაკუთრებით მოხარულები ვართ, რომ ამ პროექტით „აირექსი“ დაინტერესდა და მოგვეცა შესაძლებლობა ამ თანამშრომლობით კიდევ უფრო წარმატებით განვახორციელოთ პროექტი, რომელიც საქართველოს კიდევ 70 სოფლის ბიბლიოთეკის ინტერნეტიზაციას გულისხმობს. გისურვებთ წარმატებას და მინდა აღვნიშნო, რომ ჩვენთვის ძალიან მნიშვნელოვანია ადგილობრივი მუნიციპალიტეტების მხრიდან დახმარება. კახეთში ამ მხრივ ძალიან წარმატებული მაგალითი გვქონდა და დარწმუნებული ვარ, რომ საქართველოს დანარჩენ რეგიონებშიც ასეთივე მხარდაჭერა ექნება ამ პროექტს“,- აღნიშნა გიორგი აბაშიშვილმა.